د پاکستاني طالبانو تحریک (ټي.ټي.پي) هغه راپورونه په کلکه رد کړل چې ګنې دغه تحریک د افغانستان له خاورې د پاکستان تر کنټرول لاندې قبايلي سيمو او خيبر پښتونخوا کې وسله وال فعاليتونه تنظيموي.
دې تحریک د یوې اعلاميې په خپرولو سره ویلي، ټول فعالیتونه یې په يادو سيمو کې دننه دي او هېڅ اړتیا نه لري چې د نورو هېوادونو له خاورې ګټه پورته کړي.
د خبرپاڼې ویه برخه: « موږ په وار وار ویلي چې له خپلې خاورې او پاکستان څخه سپيڅلي دفاعي جهاد ته ادامه ورکوو. که کومه نړیواله اداره موږ ته باور راکولی شي، نو موږ خپل مشران د پاکستان په خاوره څرګندولی شو او له هغوی سره د ملاقات زمینه هم ورته برابروو.»
همدارنګه ټي.ټي.پي هغه ادعاوې او ویډیوګانې هم په کلکه ردوي او ماشومانه یې بولي چې د دوی مشرانو ته منسوبې شوې او په کې ښودل شوې چې ياد کسان په افغانستان کې دېره دي.
د خبرپاڼې یوه برخه: « د وسلو کارتونه د ثبوت په توګه وړاندې کول، خورا ماشومانه کار دی. په دې وخت کې د داسې کارتونو جوړول دومره اسانه دي چې هر څوک یې کولی شي. کومه ویډیو چې ښودل کېږي، د چترال د جنګ وېډیو ده.»
د پوځي چارو کارپوهان بیا وایي، نړیوالې رسنۍ د پاکستاني چارواکو له خولې ادعا کوي چې ټي.ټي.پي له افغانستانه خپل فعالیتونه تنظیموي.
د پوځي چارو کارپوه جنرال صادق شینواری وايي: « د بهرنیو رسنیو تبلیغات او پاکستان دغه ادعا چې ګڼي د ټي.ټي.پي ډلې له خوا د پاکستان پر پوځیانو بریدونه د افغانستان له خاورې تنظیمېږي، دغه ادعاوې بې بنسټه دي. دغه بریدونه د ټي.ټي.پي له خوا د پاکستان په خاوره کې تنظیمېږي. دا موضوع د پاکستان خپله کورنۍ ستونزه ده او په افغانستان پورې تړاو نه لري.»
تېره ورځ یو شمېر نړیوالو رسنیو راپورونه خپاره کړل، ټي.ټي.پي په افغانستان کې دننه فعالیتونه لري او له هغه ځایه پر پاکستاني پوځيانو بریدونه کوي.
هغه څه چې د سرپرست حکومت چارواکي او خپله ټي.ټي.پي یې نه مني.
د سیاسي چارو شنونکي وايي، پاکستان تل له بېلابېلو لارو په ګټنې هڅه کوي چې نړۍ ته وښيي د پاکستاني طالبانو تحریک مشران په افغانستان کې پټنځايونه لري.
د سیاسي چارو شنوونکی توریالی ځاځی وايي: « موږ له څه باندې څلورو لسیزو راهیسې د نړیوالو او ګاونډیو هېوادونو له خوا په غمیزه کې ژوند کوو. اوس هغه وخت را رسېدلی چې خپل ځان او ملت ته پام وکړو. دا چې ټي.ټي.پي له پاکستان سره څه کوي یا پاکستان له هغوی سره څه کوي، دا د دوی کورني مسایل دي. موږ نه شو کولی خپل ژوند د پاکستان په نوم مصنوعي هېواد په خوښه تېر کړو.»
په دې وروستیو څو میاشتو کې دننه په خیبرپښتونخوا کې د ټي.ټي.پي وسله وال بریدونه او فعالیتونه زیات شوي چې له کبله یې وخت ناوخت پاکستاني ادارې هم اړې شوې چې په اړه یې توند غبرګونونه وښیي.
