په پاکستان کې له افغان کډوالو سره د ناوړه چلن او پر زور راشړلو په دوام، له ګاونډي ایران څخه هم پر زوره د افغان کډوالو او پناه غوښتونکو د را ایستلو لړۍ چټکه شوې.
د هرات اسلام کلا بندر کمیسارۍ مسوولین وایي، هره ورځ له درې تر درې نیم زره افغانان د دغه پولي له لارې هېواد ته را اوړي چې ډېری هغه یې پر زوره د ایراني ځواکونو له خوا له خپلې خاورې ايستل شوي دي.
د مسوولینو په خبره، په دې کسانو کې لسګونه هغه کسان هم شامل دي چې د ايران وېزې او دغلته د اوسېدو قانوني اسناد لري.
د هرات اسلام کلا بندر کميسار حضرت الله ضعیم وايي: «په ورځنۍ کچه له ۳۰ تر ۶۰ تنو د وېزو او پاسپورټونو لرلو سربېره، له ایران څخه را ایستل کېږي.»
له ایرانه را ایستل شوي کسان د ایراني ځواکونو د ناوړه چلن خبره کوي او وايي، سره له دې چې ایران د ورتګ وېزې او په دغه هېواد کې د اوسېدلو قانوني اسناد لري، بیا هم د پولیسو له ناوړه چلن سره مخامخ دي او پر زور را شړل کېږي.
د دوی په خبره، که په کور دننه ورته د کار زمینه برابره شي، هېڅکله به هم بهرنیو هېوادونو ته لاړ نه شي.
له ايرانه تازه را ایستل شوی ځوان وايي: « ما ښوونځی خلاص کړی خو د مجبورۍ له امله ایران ته تللی وم؛ ځکه دلته هېڅ کار نه پیدا کېږي. زه خپله کوټه کې پروت وم چې پولیس راغلل، هرڅه یې مات کړل او موږ یې هم وډبولو. له حکومت غوښتنه کوو، چې دلته په کور دننه راته د کار زمینه برابره کړي ترڅو نورو هېوادونو ته په تګ مجبوره نه شوو.»
همدارنګه له ايرانه یو بل راستون شوی کس بیا وايي:«۱۵۰ تنه یې را واړولو، ایران کې ژوند سخت شوی، هېڅکله اسانه نه و.»
په ورته وخت کې د هرات ځايي چارواکي د ایراني پولیسو له خوا له پاسپورټ او قانوني اسنادو سره د افغانانو شړلو لامل د کاري ویزو نه درلودل بولي او وايي، هغه کسان چې ايران ته د کار لپاره ځي، بايد د سیاحتي ويزو پر ځای کاري ویزې واخلي.
ډېری افغانان ایران ته د کار لپاره ځي، خو داسې کسان هم شته چې غواړي د ایران له لارې د نړۍ نورو هېوادونو ته لاړ شي.
ایران ته ډېر ورتلونکي افغانان په سیاحتي وېزو ځي؛ خو اصلي پوښتنه دا ده چې ولې د ایران حکومت د افغانانو اقتصادي وضعیت ته په کتو، کاري ویزې نه ورکوي؟
