واک ته د سرپرست حکومت له رسېدو د درېيو کلونو په تېرېدو سره د اسلامي امارت رهبر شیخ هبتهالله اخندزاده يو شمېر ولايتونو ته سفرونه وکړل چې وروستی هغه یې فارياب ته شوی.
د سیاسي چارو یو شمېر کارپوهان وايي، د اسلامي امارت رهبر باید خپل ولایتي سفرونه ډېر کړي او له ولسونو سره مخامخ لیدنې ولري.
د دوی په خبره، په تېرو درېيو کلونو کې نوموړی څو محدودو ولايتونو ته تللی او پر همدې اساس اړتيا ده چې ټولو ولايتونو ته پرله پسې سفرونه ولري، د خلکو ستونزې له نږدې واوري او د وضعيت په تړاو د معلوماتو ترلاسه کولو لپاره له خلکو سره نږدې پاتې شي.
د سیاسي چارو کارپوه سليم پيګير وايي: « د اسلامي امارت رهبر شیخ هیبت الله اخوندزاده ته په کار ده چې دغه شان سفرونه ټولو ولایتونو ته ولري، د خلکو ستونزې مخامخ واوري او حل کړي.»
د اسلامي امارت رهبر وروستی سفر فاریاب ولایت ته شوی. چارواکي وايي، فارياب کې د اسلامي امارت رهبر د خلکو ترمنځ بې اتفاقۍ او قوم پرستۍ پر له منځه وړلو ټینګار کړی او غوښتنه یې کړې چې خلک باید له دغو کارونو ډډه وکړي.
د سیاسي چارو کارپوهان د اسلامي امارت د رهبر ولایتي سفرونه مهم بولي، خو زياتوي، نوموړی ولايتونو ته د ورته سفرونو په زياتولو سره کولی شي د ستونزو پر موندلو سربېره، ولسي ملاتړ هم جلب کړي.
د سیاسي چارو کارپوه ډاکټر جنت فهیم چکري وايي: «بادغیس او بامیان ولایتونو ته د امیرالمؤمنین سفر یو ښه ګام دی. هرڅومره چې د هېواد لومړی درجه کس خلکو ته نږدې شي، یو ښه اقدام دی. »
دا په داسې حال کې ده چې له دې وړاندې د ولايتونو خلکو هم غوښتنه کړې چې د اسلامي امارت رهبر شخ هبتهالله اخندزاده باید د ولسونو په ستونزو پوهېدلو لپاره ولايتونو ته ورشي او د حل ډاډ دې ورکړي.
واک ته د سرپرست حکومت له رسېدو وروسته په تېرو درېيو کلونو کې د اسلامي امارت رهبر یوازې څو ولايتونو ته په سفر تللی او له چارواکو سره په ليدنو کې لازمې سپارښتنې کړې.
