د امريکا متحده ايالتونو بهرنيو چارو وزارت ویاند متیو مېلر فاکس نیوز ته ويلي، دغه هېواد په افغانستان کې تېرو څو لسيزو جګړو ته په پام، نه غواړي دغه هېواد یوې بلې کورنۍ جګړې ته داخل شي.
د فاکس نیوز په راپور دمېلر له قوله راغلي، نور افغانان هم په دې هېواد کې د جګړې له دوام ملاتړ نه کوي او په خبره يې، امریکا هم د عامو افغانان دريځ ته په کتو، ورته نظر لري.
هغه زیاته کړې:«دغه هېواد له ۴۴ کلونو راهیسې په جګړه کې دی. موږ نه غواړو، په افغانستان کې بیا جګړه پیل شي او افغانان يې هم نه غواړي. امریکا د وسله والو ډلو ملاتړ نه کوي.»
د سرپرست حکومت چارواکي د امریکا له لوري د وسله والو ډلو له مقاومت څخه ملاتړ نه کول پر ځای پرېکړه بولي او وايي، د افغانستان اوسنی ثبات د سیمې او نړۍ پر ګټه دی.
د اسلامي امارت مرستیال ویاند احمدالله فطرت وايي: « دا یو ښه دریځ دی چې امریکا په افغانستان کې له وسله وال مقاومت ملاتړ نه کوي. په افغانستان کې له کلونو جکړو او نا آرامیو وروسته اوس امنیت ټینګ شوی او دغه امنیت د سیمې هېوادونو او نړۍ پر ګټه دی. هېوادونه باید په یاد ولري چې په افغانستان کې د نا امنیو جوړول د هېچا پر ګټه نه دي.»
دا په داسې حال کې ده چې وړمه ورځ د امریکا د استازو جرګې د بهرنیو اړیکو کمېټې مشر مایکل مککال وویل، د احمد مسعود پر مشرۍ د اسلامي امارت له مخالفې جبهې سره دایمې اړیکې لري او کانګرېس ته يې د نوموړي د وربللو ملاتړ وکړ.
د افغانستان په اړه د امریکايي چارواکو ضد ونقیض څرګندونو ته په کتو د سیاسي چارو کارپوهان وايي، امریکا تل د خپلو ګټو لپاره کړې ژمنې ماتې کړي دي.
دوی د واشنګټن مجهول سیاست ته په پام له سرپرست حکومته غواړي چې د نا امنیو له تکرار څخه د مخنیوي په موخه د نړیوال تعامل او ولسي ملاتړ خپلولو ته لومړیتوب ورکړي.
د سیاسي چارو شنوونکی عزیز معارج وايي: « د امریکا ولسمشریزو ټاکنو ته نوماند ډونالډ ټرمپ تل دا خبره کوي، که ټاکنې وګټي، بګرام هوايي اډه به بېرته ونیسي. دوی اوس غواړي، د دې کار لپاره زمینه سازي وکړي، طالبانو ته ګواښونه رامنځته کړي او د فشار په توګه یې وکاروي. ښايي دوی افغانستان ته د بېرته راتګ پلان ولري، نو له همدې امله ضد او نقض خبرې کوي. دا د دوی لوبې دي چې د خپلو ګټو لپاره یې کوي. موږ باید د دې لپاره خپل پلان او ستراتیژي ولرو، ترڅو یو ځل بیا د نیابتي جګړو لپاره استعمال نه شوو.»
د سیاسي چارو شنوونکی ادریس محمدي ځاځي وايي: «د امریکا د دوستۍ او دوښمنۍ درک نه لګي. هغوی د خپلو ګټو لپاره هره خبره کولی او هر ګام پورته کولی شي. هوښیار ملتونه او حکومتونه پر امریکا تکیه نه کوي، بلکې پر ځان جوړونه او اتفاق کار کوي.»
سرپرست حکومت تل پر ټول هېواد د کنټرول لرلو او پياوړي مرکزي نظام خبره کوي او زیاتوي چې هېڅ وسله والې ډلې ته اجازه نه ورکوي چې د افغانستان امنیت وننګوي او یا هم افغان خاوره د نورو هېوادونو پر وړاندې وکاروي.
