ټاکل شوې، چې نن به د شانګهای سازمان غونډه د تاجکستان پلازمېنه دوشنبې ښار کې ترسره شي، چې د دغه سازمان د بهرنیو چارو وزیران به په کې برخه واخلي.
د افغانستان د بهرنیو چارو وزیر محمد حنیف اتمر هم یادې غونډې ته ورغلی او هلته یې له وړاندې د یو شمېر هېوادونو له بهرنیو چارو وزیرانو سره کتنې کړي دي.
د افغانستان بهرنیو چارو وزارت ویلي، د افغان سولې پروسه، د تاوتریخوالي زیاتوالی، پر سیاسي حل لارې ټینګار، د سولې خبرو بیا پیلیدو ته د طالبانو هڅول او دغه راز د دوه اړخیزو اړیکو لا پیاوړتیا هغه موارد دي، چې تر اوسه پرې بحث شوی.
تمه ده، چې د شانګهای همکارۍ سازمان د بهرنیو چارو وزیرانو د غونډې په دویمه ورځ د افغانستان پر روان امنیتي او سیاسي وضعیت سربېره په دې سازمان کې د افغانستان د بشپړ غړیتوب په اړه هم خبرې وشي.
افغانستان، ایران، منګولیا او بلاروس د دې سازمان څارونکي غړي دي او چین، هند، پاکستان، روسیه، تاجکستان، قرغزستان، قزاقستان او ازبیکستان د دې سازمان ۸ اصلي غړي دي.