د افغانستان عدلیې وزارت وايي، په تېرو شپږو میاشتو کې ۱۰ بهرنیانو ته د افغانستان تابعیت ورکړل شوی دی.
یاد وزارت که څه هم په دې اړه زیات جزئیات نه دي ورکړي، خو زیاته کړې یې ده،چې یاد کسان د بېلابېلو هیوادونو اوسېدونکي دي،چې په دې وروستیو کې د افغانستان د تابعیت غوښتنه کړې وه.
عدلیې وزارت ویلي،۱۰۲ افغانانو بیا په بهر کې د تابعیت تر لاسه کولو لپاره د افغانستان د تابعیت پرېښودلو غوښتنه کړې ده.
د یاد وزارت د ویاند د مالوماتو پر اساس له تېرو شپږو میاشتو راپدېخوا ۱۷۸ بهر میشتې افغانان،چې د افغانستان د تابعیت پرېښودلو غوښتنه یې کړې وه، دوسیې یې څېړل شوي دي.
د نوموړي په وینا د افغانانو له خوا د خپل تابعیت پرېښودلو لوی لامل دا دی،چې یو شمېر هېوادونه دوه ګونی تابعیت نه قبلوي او د کوربه هېواد د تابعیت تر لاسه کولو لپاره باید خپل اصلي تابعیت پرېږدي.
