د عامې روغتیا وزارت مرستیال ویاند میروس علیزی وايي، د کورونا وبا درېیمې څپې اوج لاهم پر خپل ځای دی او په نورو هېوادونو کې د څلورمې څپې له خپرېدو سره افغانستان هم خوندي نه شي پاتې کېدای.
علیزي زیاته کړه:« موږ نه شو رد کولای، کېدای شي، زموږ هېواد د څلورمې څپې تر ګواښ لاندې وي، چې څلورمه څپه هم رامنځته شي. موږ د اوس لپاره په درېیمه څپه کې قرار لرو او د درېیمه څپه اوس هم په اوج کې ده او زموږ ګراف په یو لیول کې دی.»
په ورته وخت کې علیزی وايي، د کورونا وبا پر ضد یې مبارزه چټګه کړې، خو په وینا یې روانې جګړې پو ګڼو سیمو کې روغتیايي چوپړتیاوې اغیزمنې کړي دي.
علیزی زیاتوي:« جګړه منفي تاثیر لري، پر روغتیایي چوپړتیاوو ځکه زموږ ډاکټران نه شي کولی چې روغتیایي مرکزونو ته ولاړ شي او چوپړتیاوې وړاندې کړي. تر اوسه پورې د اکسیجن د لېږد په برخه کې له تاجکستان او ازبکستان هېوادونو او یا هم له ایرانه کومه ستونزه موجوده نه ده.»
له دې سره روغتیا وزارت د کورونا د مثبتو او مړینې هغه ارقام خپاره کړل،چې له دوی سره په تېرو ۲۴ ساعتونو کې ثبت شوي دي.
روغتیا وزارت وايي په تېره یوه شپه او ورځ کې ۱۲۳۶ کسان پر کورونا وبا اخته شوي، ۸۵ کسان مړه شوي او ۱۵۰۹ کسان ترې بېرته روغ شوي دي.