د حکومت د اطلاعاتو او رسنیو په مرکز کې د دولتي ادارو د یو کلنو لاسته راوړنو تشرېح پروګرام په دوام، دا د ملي دفاع وزارت پرون چهارشنبه د (۱۴۰۳ کال د وږي پر ۷ مه ) د تېر یوه کال لاسته راوړنې له رسنیو سره شریکې کړې.
د دغه وزارت چارواکو د وسله وال ځواک روزنه او سمبالول، د هېواد په کچه د امنیت او ټیکاو ټینګښت، د سرحدونو ساتنه، د سپکو او درنو وسلو بیا رغول، د پرسونل ظرفیت لوړول او همدا راز د وسله والو ځواکونو شمېر زیاتول د تېر کال مهمې لاسته راوړنې وګڼلې.
د دغه وزارت د وسله والو ځواکونو لوی درستیز قاري فصیح الدین فطرت د ملي دفاع وزارت د تېر کال راپور وړاندې کولو پرمهال وویل، له هغو هېوادونو سره له دیپلوماتیکو چینلونو له لارې خبرې روانې دي چې د افغانستان پر هوايي حریم تېری کوي.
د فطرت په خبره، ډېر ژر به د افغانستان هوايي حریم د افغانانو تر کنټرول لاندې راشي.
فطرت زیاتوي:« له ډیپلوماتیکو له لارو هغوی سره د خبرو کولو هڅه شوې، چې زموږ هوايي حریم نقضوي. همدارنګه ملي دفاع وزارت لاس تر زنې نه دی ناست، جدي هڅې روانې دي او په نږدې راتلونکي کې به هوايي حریم زموږ تر کنټرول لاندې شي او له هغX وروسته به هېڅوک زموږ پر هوايي حریم تېری نه شي کولی.»
په ورته وخت کې فطرت په افغانستان کې د داعش ډلې د بشپړې ماتې او له منځه تګ خبر ورکوي او زیاتوي، چې اوس مهال دغه ډله په هېڅ ځای کې فزیکي حضور نه لري.
لوی درستيز په دې اړه وايي: « که څه هم داعش په ځینو سیمو کې تخریبي عملیات کړي، خو دغه ډله د افغانستان په هېڅ ځای کې فزیکي حضور نه لري. اسلامي امارت هڅه کړې،چې دغه عملیات هم صفر کړي. اوسمهال داعش په بشپړه توګه له منځه وړل شوی.»
فطرت د افغانستان د پوځي الوتکو او چورلکو په اړه د امریکا او ازبېکستان ترمنځ شوې موافقې په اړه هم غبرګون وښود.
لوی درستیز ازبېکستان ته اړول شوې الوتکې او چورلکې د افغانانو حق وګاڼه او وویل، چې د بېرته ترلاسه کولو لپاره به له هرې ممکنه لارې کار واخیستل شي.
هغه زیاتوي:« دغه الوتکې په افغانستان پورې اړه لري او زموږ حق دی. موږ د خپل حق اخیستلو لپاره له هرې ممکنه لارې کار اخلو. پر ازبېکستان هم غږ کوو چې د ګاونډیتوب اصول په پام کې ونیسي او داسې څه ونه مني، چې له مخې یې یو زورواکی د بل چا حق دوی ته وبښي.»
د ملي دفاع وزارت ویاند عنایت الله خوارزمي وايي، دا مهال د وسله والو ځواکونو شمېر له ۱۸۰ زرو اوښتی او ټاکل شوې دغه شمېره تر ۲۰۰ زرو ورسوي.
د خوارزمي په خبره، وسله وال پوځ ته یې د جلب او جذب اصلي معیار اسلامیت او افغانیت دی، خوهغو کسانو ته لومړیتوب ورکول کیږي، چې تېر ۲۰ کاله یې په افغانستان کې د امریکا او متحدینو د حضور پر وړاندې مبارزه کړې.
خوارزمي زیاتوي:« د جلب او جذب لپاره د ملي دفاع وزارت د مشرتابه معیار افغانیت او سلامیت دی، خو په تېرو درېیو کلونو کې د جلب او جذب لومړیتوب هغو کسانو ته ورکړل شوی، چې تېر ۲۰ کاله له اسلامي امارت سره وو او له امریکایانو سره جنګېدلي دي.»
ملي دفاع وزارت که څه هم خپل ځواکونه په اړینو پوځي تجهیزاتو سمبال بولي او وايي د هېواد له ځمکنۍ بشپړتیا دفاع ته چمتو دي، خو هڅې روانې دي، چې وسله وال ځواکونه لا په پرمختللو وسلو او ټکنالوجۍ سمبال شي.
