که څه هم د افغانستان سرپرست حکومت هرځل د پاکستاني چارواکو له خوا شوې ادعاوې رد کړې دي، خو له دې سره سره د پاکستان لومړي وزير شهباز شريف یو ځل بیا ادعا کړې، چې د پاکستاني طالبانو تحریک (ټي.ټي.پي) په افغانستان کې پټنځايونه لري.
شریف د کابينې غونډې ته ويلي، د افغانستان له خاورې يې د ټي.ټي.پي د ګټه اخیستنې په تړاو د افغانستان له سرپرست حکومت سره مالومات شريک کړي، خو په خبره يې پر دې سربېره هم د ټي.ټي.پي پر وړاندې هغسې ګام نه دی پورته شوی، چې پاکستان يې تمه درلوده.
د پاکستان لومړي وزیر زیاته کړې: « هو! دا ټولو ته روښانه ده، چې ټي.ټي.پي په افغانستان کې پټنځايونه او مرکزونه لري او له هغه ځایه دلته راځي او وسله وال بریدونه کوي. څو ځلې مو له کابل سره خپلې اندېښنې شریکې کړې، خو له بده مرغه تر اوسه پورې يې هېڅ جدي اقدام نه دی کړی.»
نوموړي ټينګار کړی، چې دامهال د ترهګرۍ له منځه وړلو وخت را رسېدلی او پر وړاندې یې هر ډول اقدام ته چمتوو دی.
خو د ملي دفاع وزارت د شهباز شريف دا ادعا بې بنسټه بولي او وايي، نوموړی په هېڅ صورت په افغانستان کې د ټي.ټي.پي موجوديت نه شي ثابتولی.
د وزارت په خبره، په قبايلي سیمو او د پاکستان تر کنټرول لاندې نورو سيمو کې د پاکستاني طالبانو تحریک مهارول د پاکستان مسووليت دی، نه د افغانستان.
د ملي دفاع وزارت لوی درستېز قاري فصیحالدین فطرت وايي:« موږ ټول په دې پوهېږو، چې ټي.ټي.پي په پاکستان کې ښکاره مرکزونه لري، ځینې ساحې یې تر کنټرول لاندې دي او له هغه ځایه خپل عملیات پرمخ وړي. دا ښه نه ده،چې پاکستاني چارواکي بیا بیا د خپلې کمزورتیا بار پر افغانستان اچوي. موږ په افغانستان کې د ټي.ټي.پي شتون، تمویل او تجهیز قطعا ًنه منو.»
د ملي دفاع وزارت چارواکي د پاکستانیانو هغو څرګندونو ته په اشارې، چې وايي، د ټي.ټي.پي د فعاليتونو مهارولو لپاره به په افغانستان کې ځینې اهداف په نښه کړي، ډاډ ورکوي، چې د دوی ځواکونه د خپلې خاورې بشپړې دفاع ته چمتو دي.
د ملي دفاع وزارت د پالیسۍ او ستراتیژۍ مرستیال مولوي محمد قاسم فرید وايي: « د پاکستان لومړي وزیر د تورونو ځواب دا دی، چې موږ تیار یو، له خپلې خاورې، نظام او ځمکنۍ بشپړتیا څخه په هره بیه دفاع وکړو او د دې لپاره هېچا ته سر نه ټیټوو. اسلامي امارت دا ثابته کړې هم ده. د افغانستان ملت دې ډاډه وي او نړۍ د هم واوري، چې موږ د خپل خاورې له دفاع څخه د سر په بیه هم نه شاته کېږو.»
د پوځي چارو کارپوهان وایي، پاکستان د دا ډول تورونو په پورې کولو سره غواړي افغانستان د ترهګرۍ ځاله معرفي کړي، څو له دې لارې په افغانستان کې خپلو سیاسي اهدافو ته ورسېږي.
د پوځي چارو کارپوه توریالی ځاځی وايي: « دا هغه سیاسي لوبې او فشارونه دي، چې پاکستان او د نړۍ نور هېوادونه ترې کار اخلي. اسلامي اماریت تاریخي مسوولیت لري، چې پاکستان ته غوڅ ځواب ورکړي، مګر اسلامي امارت تر اوسه دا کار نه دی کړی.»
شهباز شریف دا څرګندونې داسې مهال کوي، چې تېره ورځ په بلوچستان کې د پاکستاني پوليسو پر مرکزونو، د اورګاډي پر کرښو او د لویو لارو پر ګاډو د بلوڅ بېلتون غوښتونکو په بریدونو او د پوځ په ځوابي ډزو کې لږ تر لږه ۶۰ کسان وژل شوي دي.
