د ولسي جرګې ګڼو غړو نن په امتیازي ساعت کې د خبرو په مهال وویل، د امنیتي ادارو په مشرتابه کې کمزوري او د مسوولیت پر وړاندې بې پروایي د دې سبب شوې، چې جګړې دوام وکړي او د هېواد وضعیت ورځ تر بلې کړکېچن شي.
وکیلانو دغه راز نیوکه وکړه، چې د امنیتي ادارو مسوولین د روان وضعیت په اړه ولسي جرګې او ولس ته وضاحت نه ورکوي او دا مسئله د اندېښنې وړ ده.
دوی ټینګار وکړ، چې امنیتي ځواکونه پیاوړي دي او د جګړو وړتیا لري، خو په مدیریت او دوی ته د امکاناتو د برابرولو په برخه کې کمزوري د دې سبب شوې، چې وضعیت د ښه کېدو پر ځای لا زیات ترینګلی شي.
د ولسي جرګې غړو تر دې وړاندې هم ټینګار کړی وو، چې د امنیتي او دفاعي ادارو په مشرتابه او مدیریت کې د کمزورۍ له امله امنیتي وضعیت ترینګلی شوی دی.
