د هېواد په شمال او لويدېځ کې د طالبانو لاس ته د ځېنو سوداگريزونو بندرونو له لوېدو وروسته اوس د بلخ ولایت سوداگرۍ او پانګونې خونه وايي، حيرتان بندر کې د وارداتو او صادراتو کچه د تېر پرتله نيم په نيمه راټيته شوې ده.
د یادې خونې مشر نصير احمد قاسمي له شمشاد ټلوېزیون سره په خبرو کې وویل، د روان وضعيت په دوام سره به حيرتان کې سوداگريزې چارې نورې هم زيانمنې شي.
قاسمي زیاته کړه:«حیرتان بندر ته شااوخوا درې میاشتې وړاندې د ورځې په منځڼۍ کچه ۲۵۰ باربري موټر داخلېدل. خو اوس د حیرتان بندر ته په منځنۍ کچه د ورځې ۱۰۰ یا ۱۲۰ باربري موټر داخلېږي. د افغانستان صادرات، چې موږ بېلابېلو هېوادونو ته لرل، د وروستیو نا امنیو له امله خنډ سره مخ شوي دي.»
د قاسمي په وينا،حيرتان کې د سوداگريزو چارو د ټکني کېدو تر څنګ د روانو نا امنيو له امله بلخ ولايت کې د پانګونې کچه هم د پخوا پرتله ټيټه شوې ده.
په ورته مهال يو شمېر سوداگر د اندېښنې په څرګندولو سره وايي، د جګړو له امله د وارداتو او صاداراتو کچې ټيټېدو سره په بازارونو کې د توکو بيې هم لوړې شوې دي.
بلخ کې د کسبه کارانو او اصنافو مدير ميرویس احمدي وايي: « ناامنۍ په ټوله کې اغېزه لري. پخوانی بازار پاتې نه دی. تاسو ته مالومه ده،چې بازار له ۵۰ سلنې هم ډېر کمزوری شوی دی او ښکته راغلی دی.»
خو د بلخ ولايت والي فرهاد عظیمي بیا ډاډ ورکوي،چې د حيرتان بندر امنيت خوندي دی.
عظيمي زیاته کړه:« اوس د حیرتان بندر کې هېڅ ګواښ شتون نه لري. موږ ټولو نظامي او ملکي مامورینو ته لارښونه کړې، چې د تېر په څېر خپل کارونه مخته یوسي.»
په وروستۍ يوه میاشت کې طالبانو د اسلام کلا، شيرخان او آقينې سوداگريزو بندرونو کنټرول خپل کړی، چې چارواکي وايي له همدې امله د ګمرکونو د عوايدو کچه هم په بېساري ډول راټيټه شوې ده.
خبریال
