د دولتي ادارو د یو کلنو لاسته راوړنو په لړ کې پرون سې شنبې پر ورځ د (۱۴۰۳ کال د وږي پر ۶مه) د کورنیو چارو وزارت خپل یوکلن راپور له رسنیو سره شریک کړ.
د دغه وزارت چارواکي وايي،، په تېر یوه کال کې د ټول هېواد پر کچه له ۴ زرو زیاتې ټرافیکې پېښې رامنځ ته شوې، چې له امله یې ۲ زره کسانو خپل ژوند له لاسه ورکړی او نږدې ۵ زره نور ژوبل شوي دي، چې ښځې او ماشومان هم په کې شامل دي.
د کورنیو چارو وزارت ویاند مفتي عبدالمتین قانع وايي: « د یو کال په اوږدو کې ۴ زره ۲۷۸ ټرافیکې پېښې رامنځته شوې، چې له امله یې د ښځو او ماشومانو په ګډون ۲۰۰۱ تنه مړه او ۵ زره ۹۹۶ تنه ژوبل شوي دي.»
قانع وايي، د ټرافیکي پېښو د مخنیوي په موخه ځانګړې طرحه جوړه شوې، چې په پلي کېدوسره به یې تر ډېره د ټرافیکي پېښو مخنیوی وشي.
همدارنګه قانع وايي، په نږدې راتلونکي کې به د موټر چلونې جواز او د موټرو د ګرځېدو سند یا جواز سیر هم برښنايي سیسټم ته واړول شي.
د قانع په خبره، د ټول هېواد پر کچه د سړي تښتونکو بانډونه له منځه وړل شوي او د یوه کال په موده کې هېڅ یوه پېښه نه ده رامنځ ته شوې.
دغه راز قانع وايي، په تېر یوه کال کې د ځانګړو عملیاتونو پرمهال د ټول هېواد په کچه ۷۶ برمته نیوونکي یا اختطاف چیان نیول شوي او ۲۴ تنه یې له امنیتي ځواکونو سره په جګړه کې وژل شوي دي.
هغه زیاتوي: «پولیسو د برمته نیونکو پر وړاندې ۲۵۰ عملیات ترسره کړي، چې په پایله کې یې ۷۶ تنه انسان تښتوونکي نیول شوي او ۲۴ نور له پولیسو سره په جګړه کې وژل شوي دي. اوسمهال د هېواد په کچه د انسان تښتونې هېڅ ډول پېښه نه لرو.»
د کورنیو چارو وزارت چارواکي په ټول هېواد کې د نشه یي توکو د صفر کېدو خبر هم ورکوي او وايي، د تېرکال په موده کې له ۳ زره او ۶۰۰ ټنو زیات بېلا بېل نشه یي توکي نیول شوي، د الکولي مشروباتو۷۹۰ کارخونې له منځه وړل شوې او په تور یې ۱۰ زره ۵۶۴ کسان نیول شوي دي.
د چارواکو په خبره، د کورنیو چارو وزارت منسوبینو له ۱۷ زرو جریبو زیاته ځمکه یې د نشه یي توکو له کښت پاکه کړې او نږدې ۲۸ زره روږدي کسان یې راټول کړي او درملنه یې شوې ده.
قانع په دې اړه وايي: « ۳ زره ۶۴۳ ټنه بېلابېل ډوله مخدره مواد کشف او له منځه وړل شوي. د نېشه يي توکو ۷۹۰ بابه کارخونې ویجاړې شوې او ۱۰ زره ۵۶۴ تنه د نشه يي توکو اړوند جرمونو په تور نیول شوي او دوسیې یې عدلي ارګانونو ته استول شوې دي. ۱۷ زره ۶۵۱ هکټاره ځمکه د کوکنارو له کښت څخه پاکه شوې ده.»
په ورته وخت کې قانع وايي، په تېر یوه کال کې ۹۰ تنه د تاریخي آثارو د غیر قانوني کېندنو په تور هم نیول شوي او شاوخوا زر قلمه لرغوني آثار ملي میوزیم ته سپارل شوي دي.
هغه زیاتوي: « ۹۰ تنه د لرغونو آثارو د غیر قانوني کېندنو په تور نیول شوي دي»
د کورنیو چارو وزارت د چارواکو په خبره، تېر کال د تدارکاتو په برخه کې څه باندې ۸.۵ میلیارده افغانیو په ارزښت په ۲۲۸ پروژو کې شاوخوا ۱.۳ میلیارده افغانۍ سپما کړې.
د وزارت په کلني راپور کې راغلي، چې د امنیت ښه ټینګښت او د جرایمو د مخنیوي لپاره په ولایتونو او پلازمینې کابل کې پولیسو ته سلګونه عرادې موټرسایکلونه هم وېشل شوي دي.
دغه وزارت وايي، په هوايي ډګرونو، لویو لارو او بندرونو کې د شاوخوا دوه میلیونه امریکايي ډالرو، سوونه زره اروپايي یورو، میلیونونه سعودي ریالونو او زیاته اندازه سرو زرو د قاچاق مخه هم نیول شوې ده.
