د پښتو ژنې نامتو ناول لېکونکی او ژورنالیست نصیر احمد احمدي،چې پر کورونا وبا اخته و، د يکشنبې پر شپه مړ شو.
خو هغه ميليونونه توري چې ده پر سپين کاغذ پوري کړي، نوم به يې تر ډېره ژوندی ساتي.
پيغامونه او تلوسې يې کتاب کې داسې خوندورې ځای پر ځای کړي،چې ډېری کسان يې پر مطالعه روږدي کړي، عطاء الله نومی اولس کلن يې يوه بېلګه ده چې، د احمدي شل کتابونه يې مطالعه کړي.
د کابل ښار اوسېدونکی عطاء الله وايي:« ما د نصير احمد احمدي۲۰ کتابونه لوستي، زه د هغه ښې ليکوالۍ مطالعې سره بلد کړی يم.»
د کابل ښار په بېلابېلو کتاب پلورنځيو کې د نصير احمد احمدي کتابونه پلور ته اېښي، خو تر ټولو ډېر پلوری شوی يې ډيوډ جونز دی، دا هغه کتاب دی، چې لومړی يې نوم بغدادي پير و، بغدادي پېر کتاب فارسي او اردو ژبې ته هم ژباړل شوی او په پښتو کې تازه د اتم ځل لپاره چاپ شوی دی.
کابل ښار کې یو تن کتاب پلورونکی وايي:« له موږ سره د احمدي ګڼ کتابونه دي. ډېری خلک د هغه کتابونو اخېستو لپاره راځي، ځکه هغه ډېر خوندور قلم درلود.»
د نصير احمد احمدي نږدې دېرش کتابونه چاپ شوي چې ډېری يې د افغانستان د تاریخ کېسي دي.
ليکوال او شاعر عزت الله ځواب وايي:« د نصير احمد احمدي مړينه پښتو ادب لپاره يوه ضايع ده. هغه فکر نه کوم،چې بيا به د ناول ليکلو برخه کې داسې کادر ترلاسه کړو.»
نصير احمد احمدي په ۱۳۶۴ لمريز کال کې د غزني ولایت په قره باغ ولسوالۍ کې زيږيدلی،چې له شلو کالونو راهېسې يې له يوې نړيوالې رسنۍ سره دنده کوله.
