د بلوچستان آزادي غوښتونکو(بي.اېل.اې) او شمالي وزیرستان کې د پاکستاني طالبانو تحریک (ټي.ټي.پي) له لوري روانه اوونۍ په څو پرلپسې برېدونو کې د پاکستان د پوځ لسګونه پوځیانو ته مرګ ژوبله اوښتې.
بلوڅ آزادي غوښتکو په خبرپاڼه کې د هېراف په نوم پوځي عملیاتو له پيل خبر ورکړی او ادعا يې کړې، چې په دې عملیاتو کې یې د پاکستان له۱۰۰ زیات پوځیان وژلي او لسګونه نور یې ټپيان کړي.
خبرپاڼه کې ادعا شوې، چې له پاکستاني ځواکونو څخه یې یو شمېر پوځي مرکزونه او پوستې هم نیولي دي.
د خبرپاڼې یوه برخه:« د هېراف په عملیاتو کې د بلوچستان پر لویه لار د پاکستاني پوځيانو «بېلا» نومي پوځي مرکز نیول شوی او ۶۳ پوځیان په کې ووژل شوي دي. همدارنګه د بلوچستان په شاوخوا ۱۱ ولسوالیو مستونګ، پسني، کلات، ګوادر، پنجګور، تُربت، موسیخېل، سیوۍ، پښین، بېلا او کوټه کې د هدفي بریدونو په پايله کې ۱۳۰ پاکستاني پوځیان وژل شوي دي.»
له دې سره، د شمالي وزیرستان په رزمک بازار کې چاودنې هم ۵ کسان وژلي او شاوخوا ۱۰۰ نور یې ټپیان کړي دي.
په ورته مهال د خیبر پښتونخوا د ملي جمهوري غورځنګ مخکښ غړی عمر شېراني هم د دېره اسماعېلخان په درابڼ سیمه کې یوه برید کې وژل شوی دی.
د ملي جمهوري غورځنګ مشر د نوموړي پر مړینه خواشیني څرګنده کړې او هغه یې د یاد غورځنګ یو له مخکښو غړیو یاد کړی دی.
د ملي جمهوري غورځنګ مشر محسن داوړ وايي:« په ډېرې خواشینۍ سره اعلانوم، چې زموږ یو مخکښ غړی عمر شېراني په ظالمانه توګه د درابڼ سیمې په ترهګریز برید کې شهید شوی دی.»
بله خوا، د پاکستان حکومت د بلوڅ آزادي غوښتونکو له لوري د لسګونه پوځیانو د وژلو ادعا ردوي او وايي، له بلوڅ آزادي غوښتونکو سره یې په جګړه کې ۱۴ پوځيان وژل شوي دي.
د پاکستان لومړي وزیر شهباز شریف ویلي، د امنیت په ټینګښت کې کمزورتیا ته ځای نه شته او وسله والو د ځپلو لپاره به سمې پرېکړې وکړي.
هغه زیاته کړې:« د کمزورتیا لپاره ځای نه شته. له پرېکړه کوونکو اقداماتو سره به مخ ته ځو، ترڅو له ترهګرۍ سره مبارزه وکړو.»
د سیاسي چارو کارپوهان وايي، په قبایلي سیمو کې له پښتنو او بلوچستان کې له بلوڅانو سره د پاکستان د پوځ ناسم چلن د دغه هېواد پر وړاندې وسله وال تحرکات زیات کړي دي.
د سیاسي چارو کارپوه خلیل احمد نادم وايي: « تر هغو چې د بلوڅانو، پښتنو، سېندیانو او نورو لږکیو حق ور نه کړل شي، پایله به یې همداسې وي، پنجابیان به وژل کېږي او پاکستان به د خرابۍ خواته ځي.»
دا په داسې حال کې ده، چې پاکستان د پښتون ژغورنې غورځنګ پر مشر منظور احمد پښتین بلوچستان ته د داخلېدو بندیز لګولی دی.
د پښتون ژغورنې غورځنګ د حق غوښتنې په خپله مبارزه کې تر دې مهاله يو شمېر مخکښ فعالان له لاسه ورکړي او ان د علي وزير په شمول يې ګڼ نور مخکښ مشران د پاکستان په زندانونو کې بنديان دي.
