د افغان سولې لپاره د امریکا بهرنیو چارو وزارت ځانګړی استازی زلمی خلیلزاد یوځل بیا د سېمې هېوادونو ته په سفر وتلی.
خلیلزاد وايي، هڅه کوي چې په افغانستان کې د جګړې د پای لپاره د سیمې له هېوادونو سره پر ګده حل لار پیدا کړي.
خلیلزاد پر خپله ټویټر پاڼه لیکي، د طالبانو او افغان حکومت ترمنځ به د هوکړې لپاره خپله ډیپلوماسي جاري وساتي.
د هغه په وینا، یوې داسې سولې ته اړتېا ده چې د افغانستان حاکمیت او ځمکنۍ بشپړتیا په کې خوندي وي.
خلیلزاد زیاته کړې: « موږ به له افغان جهتونو او سیمه ییزو او نړیوالو ښکېلو غاړو سره پر ګډه کار کوو، تر څو د روانې جګړې پای ته رسولو لپاره د حل لاره پیدا کړي. هغه حل لاره چې د افغانستان خلکو امنیت، یووالی، حاکمیت او ځمکنی بشپړتیا تامین کړي.»
خو د ساسي چارو یو شمېر شنونکي بیا وایي، پر طالبانو د جګړې کمېدو او په حکومت د سولې لپاره فشارونه راوستلی شي، ترڅو واک درېیم لوري ته وسپارل شي.
د سیاسي چارو شنونکی عبیدالله برهاني وايي:« د فشار اصلي لوری چې سړی ووایي هغه د کابل لوری ده، چې باید فشار پرې راشي، ترڅو سوله لومړیتوب وګڼي او قرباني ورکړي. دا قرباني د طالب لپاره نه، د خلکو لپاره باید واک درېیم لوري ته وسپاري. په عین وخت کې پر طالبانو دا فشار راوستلی شي چې اورکم او اوربند طرف ته لاړ شي، نه دا چې د جګړې څپې نورې وغځیږي، ترڅو طرفین د سولې خوا ته لاړ شي.»
روانو سختو نښتو ولسمشر غني پر طالبانو غوسه کړی او د دوی پر وړاندې یې دریځ خورا سخت شوی دی.
د هغه وروستی غږ په خوست کې پر دې ډلې و چې د سولې خبرو ته دې کېني او دا دې ووایي، چې جګړه د چا لپاره کوي؟ خو طالبان بیا د سولې برخه کې افغان حکومت خنډ بولي.
د چارو شنونکي وایي، خلیلزاد به دا ځل د سیمې هېوادونو ته دا پیغام ورکړي،چې افغانان پرېږدي ترڅو د خپل هېواد راتلونکې پر خپله وټاکي.
د سیاسي چارو شنونکی خلیل نادم وايي:« ډاکتر خلیلزاد به په دې سفر کې د تاشکند په کنفرانس کې برخه واخلي. دغه کنفرانس د هېوادونو ترمنځ د نښلول کېدو کنفرانس ده، چې ډېر اغېزناک ده او دلته به د امریکا پیغام دې هېوادو ته ورسوي،چې افغانستان د هېوادونو د د نښلول کېدو سیمه ده او باید مداخله ونه کړي، پرېږدي چې افغانستان کې سوله او ثبات راشي د افغانستان سوله او ثبات د سیمې او نړۍ پر ګټه ده. افغانان چې دا ۴۲ کاله جګړه کې سوځي، دوی ته باید فرصت ورکړل شې، ترڅو خپل برخلیک پر خپله وټاکي او جګړه پای ته ورسېږي.»
د امریکا د بهرنیو چارو وزارت په وینا پاڼه کې ویل شوي چې خلیلزاد به د افغان سولې لپاره په دې سفر کې چې مرکزي اسیا او منځنی ختیځ هم په کې شامل دی، پرېکنده ډیپلوماټکي هڅې وکړي. خلیلزاد به دوحه کې د سولې مرکچي ډولو سره هم لېده کاته وکړي.
د افغان سولې لپاره د امریکا ځانګړی استازی داسې مهال بیا پر سفر راوتلی چې طالبانو په یو شمېر ولسوالیو کنټرول ترلاسه کړی دی.