د ننګرهار ولایت مرکز جلال اباد ښار اړوند اوومې ناحیې او سره رود ولسوالۍ یو شمېر سیمو کې د تېرې سې شنبې په شپه د شدیدو ورښتونو او سېلابونو له امله خلک زیانمن شوي او سلګونه هټۍ او کورونه ویجاړ شوي دي.
د یادو سېلابونو له امله زیانمن شوي خلک وايي، کورونه یې وران شول او راتلونکي ژمي ته د سرپناه نه لرو له امله اندېښمن دي.
دوی له سرپرست حکومت او مرستندویه موسسو غوښتنه کوي، چې د کورونو د بیارغولو سربېره دې ورسره په بېلابېلو برخو کې مرستې وکړي.
یو تن سېلاب ځپلی وايي:« سېلابونه راغلل، نن پنځمه ورځ ده، چې بې کوره یې تېروو. موږ ته هېڅ نه دي راپاتې، باید د نورو مرستو ترڅنګ نغدي مرستې هم راسره وشي. موږ راتلونکي ژمي ته ډېره اندېښنه لرو.»
همدارنګه یو بل سېلاب ځپلی بیا وايي: « ژمی را روان دی، د ژمي ستونزې خو ټولو ته معلومې دي. چې کور ونه لرې له سړې هوا سره به څه کوې. موږ له حکومت او نړیوالو د مرستې غوښتنه کوو.»
ننګرهار کې د طبیعي پېښو وړاندې د چمتووالي ادارې مسوولین د مرستندویه چارو د پيل خبره کوي او وايي، د دغو سېلابونو له امله ۸۰۰ کورنۍ زیانمنې شوې او د مرستو په موخه د دوی سروې هم بشپړه شوې ده.
د یادې ادارې د پېښو آمر ادریس ساپی وايي، د تثبیت شویو ۸۰۰ کورنیو له ډلې ۳۰۰ هغو سره د لنډمهاله میشتېدنې په موخه د خېمو او غیر خوراکي توکو مرستې عملا پیل شوې دي او پاتې نورو سره به هم نږدې وخت کې مرستې ترسره شي.
ساپی زیاتوي: « د دغو طبیعي پېښو له امله په ننګرهار ولایت کې ۸۰۰ کورنۍ زیانمنې شوې دي. ۳۰۰ کورنیو ته د لنډمهاله سرپناه په توګه خېمې او نور غیر خوراکي توکي لرو. همدې کورنیو ته به خوراکي توکي او نغدي مرستې هم ووېشل شي.»
د مسوولینو د مالوماتو له مخې، د تېرې اوونۍ سېلابونو له امله یو ماشوم مړ او شپږ تنه نور ټپیان شوي وو.
له دې سربېره، د ننګرهار په سره ردو، هسکې مینې، اچین او غني خېلو ولسوالیو کې هم را وتلو سېلابونو د خلکو کرنیز فصلونه ویجاړ کړي دي.
