د ملي دفاع وزارت په کابل ښار کې د هوايي مدافعې سیستم له فعالولو خبر ورکړی دی.
د یاد وزارت مرستیال ویاند فواد امان په دې اړه له ډېرو جزئیاتو ورکولو پرته وویل، دغه اله اوس مهال فعاله شوې.
د وزارت د مالوماتو له مخې، دا د راکټونو او مزايلو د دفعې لپاره په نړۍ کې د تجربې پر بنسټ خورا ګټور ثابت شوی سيسټم دی.
د یاد وزارت له لوري په خپره شوې، خبرپاڼه کې راغلي، امنيتي سکتور او افغان امنيتي او دفاعي ځواکونه د خپلو خلکو او خاورې د دفاع لپاره د سر په بیه چمتو دي، دغه سيسټم هم د همدې موخو له ډلې دی، چې پر جګړییزو احضاراتو مثبته اغېزه لري.
کابل کې دا سیسټم داسې مهال فعال کېږي، چې تر دې وړاندې د کابل ښار مهمې سیمې تر توغندیزو او راکټي بریدونو لاندې وې، چې له امله یې یو شمېر ملکي کسانو ته مرګ ژوبله اوښتې وه.