د ۲۰۲۱ میلادي کال د اګسټ پر ۲۱مه امریکايي او نورو بهرني سرتیري داسې مهال په يوه بريد کې په نښه شول، چې له کابل هوايي ډګره د وتلو په حال کې وو.
په دې برید کې د ۱۳ امریکايي سرتېرو له وژل کېدو سربېره شاوخوا ۱۷۰ عامو افغانانو ته هم مرګ ژوبله واوښتله.
که څه هم د دې برید مسوولیت هغه مهال د داعش ډلې پر غاړه واخیست، خو تازه بزنېس سټنډرډ خپرونې په پنټاګون کې د یوې سرچینې له قوله خبر ورکړی، چې امریکا د کابل هوایي ډګر وروستی برید، بې ځوابه نه پرېږدي او د عاملینو د پيدا کولو په لټه کې یې ده.
سرچینې زیاته کړې:« په کابل کې پر امریکايي ځواکونو د وروستي برید عاملینو د پيدا کولو په لټه کې یوو.»
که څه هم د کابل په هوایي ډګر کې پر امریکايي ځواکونو وروستی برید د داعش خراسان ډلی منلی، خو د امریکا له خوا د برید کوونکو او هغوی ته د اسانتیاوو برابروونکو په اړه د دوی پلټنو پوښتنې را پورته کړې دي.
که څه هم د یاد برید په تړاو د امریکایانو د پلټنو دلیل نه دی روښانه، خو د سیاسي چارو کارپوهان د ورته پېښو عامل په خپله امریکا ګڼي او زیاتوي، په افغانستان کې د ټولو جنګي جنایتونو پوښتنه باید له امریکا وشي.
د سیاسي چارو کارپوه توریالی ځاځی وايي:« د هغو ټولو جنایتونو اصلي عامل امریکا ده، چې په تېرو ۲۰کلونو کې په افغانستان کې ترسره شول.»
ځېنې نور بیا وايي، که امریکا وغواړي په افغانستان کې د وروستیو بریدونو ترسره کوونکي پيدا کړي، نو دغه کړنه د افغانستان په چارو کې ښکاره لاسوهنه ده او زیاتوي، چې له دې سره به د کابل او واشنګټن د اړيکو احتمال له منځه لاړ شي.
د سیاسي چارو شنوونکی سېلاب سمندر وايي: «دا چې امریکایان اوس د هغې پېښې عوامل په ګوته کوي یا یې له منځه وړي، دا به د افغانستان په داخلي چارو کې نظامي لاسوهنه وي او طالبان به یې ونه مني. دا کار به د دې لامل شي، چې د سرپرست حکومت او امریکا ترمنځ شته پټې او ښکاره اړیکې نورې هم زیانمنې کړي.»
له افغانستانه د امريکا په شمول د بهرنيو ځواکونو وتل د دوحې له هوکړې وروسته يقيني شول او د کارپوهانو باور دا دی، چې امريکا په ورته پلټنو د يادې هوکړې له ځينو بندونو سرغړونه کوي.
