د دواړو هېوادونو بهرنیو چارو وزیرانو تېره ورځ په لیدنه کې د افغانستان پر روان وضعیت خبرې وکړې او د تاوتریخوالي کمېدو غوښتنه یې وکړه.
د هند بهرنیو چارو وزیر جې شنکر پرون د روسیې د بهرنیو چارو له وزیر سرګي لاوروف سره له لیدو وروسته وویل، په افغانستان کې حالات خواشینوونکي دي.
جې شنکر وویل، تاوتریخوالی د افغانستان ستونزه نه شي حل کولی.
د روسیې د بهرنیو چارو وزیر هم افغانستان کې په روانو حالاتو اندېښنه وښوده.
هغه د یو داسې سیاسي بهیر په ژر پيلېدو ټېنګار وکړ، چې ټول افغانان یې ننګه وکړي.
په همدې حال کې د هند د بهرنیو چارو وزارت ویلي، د افغانستان روانو حالاتو سره سره به دا هېواد په کابل کې خپل سفارت ونه تړي.
هغه وویل، افغانستان کې ورځ تر بلې خرابېدونکی امنیتي وضعیت او دغه هېواد کې د هندي وګړو د امنیت او خوندیتوب مسایل له نږدې څاري.