شهرصفا ولسوالۍ چې د کندهار ـ کابل پر لویه لاره پرته ده د زابل ولایت د لسو ولسوالیو له ډلې وروستۍ او ستراتیژیکه ولسوالۍ ده، چې طالبانو ونیوله.
طالبان توانېدلي، چې له تېرې یوې میاشتې راهیسې د دغه ولایت ټولې ولسوالۍ په بشپړ ډول له حکومتي ځواکونو ونیسي.
طالبانو هم په یوه رالېږلي پیغام کې ویلي، چې ولسوالۍ يې تر څو ورځنۍ محاصرې وروسته نیولې، سرتېري ورته تسلیم شوي او دوی ته یې ګڼ شمېر سپکې او درنې وسلې په لاس ورغلي دي.
د دې ولسوالۍ په سقوط سره تر دا مهاله یوازې د زابل ولایت مرکز کلات ښار د حکومت په ولکه کې دی، او نورې ټولې سیمې د طالبانو تر واک لاندې راغلي دي.
حکومتي سرچینې په رسمي توګه په دې اړه له څه ویلو ډډه کوي.
