د نړۍ پر کچه د اقلیمي بدلون یوه له سترو نښو د سمندر له سطحې لوړو هېوادونو کې د اوبو کمښت دی. دغه کمښت اوس د افغانستان په سوېلي او سوېل لوېدیځو ولایتونو کې تر نورو ډېر لیدل کېږي. کندهار یو له هغو ولایتونو دی، چې دا مهال د اوبو له جدي کمښت سره مخامخ دی.
د کندهار ښار په نهمه ناحیه کې د پاکو اوبو یوه ژوره څاه او ټانکۍ یوازې د یوه کلي اوسېدونکو لپاره جوړه شوې، خو په خپلو کلیو کې د اوبو نه لرلو له امله د څو نږدې کلیو اوسېدونکي هم ګټه ترې اخلي.
د یادې سیمې یو شمېر اوسېدونکي وايي، په سیمه کې د پاکو اوبو سخته اړتیا ده او خلک نه شي کولی په پیسو اوبه واخلي.
د کندهار ښار یو تن اوسېدون صالح محمد وایي: « د پنځو شپږو جماتونو خلک له دې څاه څخه اوبه وړي. څاه یوه، خو نفوس ډېر دی. موږ ته باید د پاکو اوبو نورې څاه ګانې هم وکېندل شي.»
د کندهار ښار یوبل اوسېدونکی فدامحمد وایي:« دلته له ډېرې لرې فاصلې څخه خلک راځي او له دې ځایه اوبه وړي. د سهار له لمانځه څخه تر نهو بجو پورې له دې ځایه خلک اوبه وړي.»
د صدیق الله په نوم یو یو ځايي اوسېدونکی د دولتي اوبو له لوړې بیې شکایت لري او وایي: « زموږ په کلي کې اوبه نه شته او دلته پسې راځو. دولت د پاکو اوبو نلونه راتېر کړي، خو موږ یې د اخیستلو وس نه لرو.»
دا یوازې نهمه ناحیه نه ده، بلکې په کندهار کې ښار کې دا مهال نورې ناحیې او زیات شمېر خلک د پاکو اوبو له نه شتوالي سره مخ دي.
د دغه ولایت د اوبو رسولو ریاست د مسوولینو په خبره، دا مهال د کندهار ښار یوازې ۱۵ سلنه اوسېدونکي د ښاري شبکو اوبو ته لاس رسی لري.
د مسوولینو په وینا، دوی په دې برخه کې ډېرې پروژې تر لاس لاندې لري او هڅه کوي ټول ښار ته اوبه ورسوي.
د کندهار ښار د اوبو رسولو ریاست تخنیکي آمر انجنیر نیاز محمد مسلم وايي:« د ښاري اوبو رسولو ریاست په تېرو دوو کالو کې ۴ زره کورنیو ته اوبه رسولې دي؛ خو دا چې اوس وچکالي ډېره شوې، نو موږ هم خپلې هڅې چټکې کړې دي، له ګڼو موسسو، ډونرانو او د مرکزي حکومت له چارواکو سره مو اړیکې نیولې، چې په پایله کې یې ۲ زره نورو کورنیو ته هم اوبه چمتو شوې دي. هڅه کوو، چې د ښار په ټولو برخو کې د څښاک اوبو سیسټمونه فعاله کړو.»
د کندهار د اوبو رسولو ریاست د مسوولینو په خبره، په تېرو درېیو کلونو کې ۶ زره کورنیو ته د څښاک پاکې اوبه رسول شوې او لا هم یو شمېر نیمګړې پروژې ترلاس لاندې دي،چې په بشپړېدو سره به یې ګڼو نورو کورنیو ته هم اوبه ورسول شي.
