د راپورونو له مخې، دغه خبرې به د افغانستان په اړه د امریکا د تګلارې، د افغانستان پر روا وضعیت او دغه راز د ځواکونو د ایستلو په اړه ورټولې وي.
تېره ورځ د سپینې ماڼۍ ویاندې جین ساکي ویلي، ولسمشر بایډن به د خپل ملي امنیت له ډلې سره وګوري، ترڅو له افغانستانه د ځواکونو وتلو کې د پرمختګ په اړه وروستي مالومات ترلاسه کړي.
جین ساکي ویلي، جو بایډن به له افغانستانه د بهرنیو ځواکونو د پرلپسې وتلو، د افغانستان له ملي امنیتي او دفاعي ځواکونو او ملکیانو سره د بشري مرستې او د افغانستان د روان امنیتي وضعیت په هکله خبرې وکړي.
نوموړې زیاته کړې، ولسمشر بایډن په دې خاطر له افغانستانه د ځواکونو د ایستلو پرېکړه وکړه، چې احساس یې کړه دا جګړه په ۲۰ کلونو کې له پوځي لارې پای ته ونه رسېده او نه هم پوځي حل لاره لري.