په خیبر پښتونخواه کې د پاچا خان فکري مرکز له انګرېزي ښکېلاکه د افغانستان د خپلواکۍ بېرته اخیستلو ۱۰۵ کالیزه نمانځلې.
په دغه نمانځغونډه کې د عوامي نېشنل ګوند ایالتي مشر میا افتخار حسین په خپله وینا کې د پاکستان پوځ د پښتنو په وژنه تورن کړ او د ۱۹۴۸ ز کال د بابړي پېښې په تړاو یې ګډونوالو ته د معلوماتو ورکولو پرمهال وویل، پوځ د بابړي جنګ کې په زرګونه پښتانه ووژل.
حسین د پاکستان پر حکومت غږ وکړ، که ترهګري ختمول غوړاي نو پیل یې باید له پنجاب څخه وکړي؛ ځکه په خبره یې د ترهګرۍ اصلي رېښه هلته ده.
هغه زیاته کړه: «که تاسو کې ایمان وي او وايي چې ترهګري ختموم، نو له پنجاب څخه یې را پيل کړه؛ ځکه چې د هرڅه ریښه هلته ده.»
د عوامي نېشنل ګوند مشر د پاکستان د استخباراتو پخوانی مشرفیض حمید د پښتون قوم د ربړولو په تړاو ستر مجرم بللی او زیاتوي، چې نوموړي په ځلونوهڅه کړې چې د پښتنو ثقافت ته زیان ورسوي.
هغه زیاتوي: « د فیض حمید تر ټولو لوی جرم دا د، چې زموږ ثقافت یې خراب کړی. ده ته باید داسې سزا ورکړل شي، چې راتلونکی نسل یې یاد وساتي.»
د پاکستان د حکومت له خوا پر عامو پښتنو ظلم او زور زیاتی نوې خبره نه ده. دغه هېواد د خپل جوړښت راهیسې د پښتنو په وژلو، نیولو او ورکولو کې لاس لري، خو د بشري حقونو سازمانونه یې پر وړاندې چوپه خوله پاتې دي.
د خیبرپښتونخواه په پاچان خان فکري مرکز کې دغه غونډه د اګسټ پر ۱۹ مه نېټه چې د افغانستان د خپلواکۍ له ۱۰۵مې کلیزې سره سمون لري، جوړه او دغه ورځ په کې ونمانځل شوه.
په دې غونډه کې د لرو او برو پښتنو پر یووالي، پرمختګ او په پښتون وطن کې د پردیو جګړو په زیانونو او عواملو بحثونه وشول.
