تورن جنرال دادان لونګ چې نوی د ۲۰۳ تندر قول اردو قوماندان ټاکل شوی وایي، پر ډیورنډ فرضي کرښه به د پاکستاني ځواکونو د وروستیو تحرکاتو پر وړاندې چوپ پاتې نه شي او امنیتي ځواکونه به له شته امکاناتو په ګټه اخیستنې ځواب ورکړي.
لونګ زیاته کړه:« ښه دې واوري، غربي ګاونډی، سوېلي ګاونډی، شمالي ګاونډی، ټول دې واوري. پوځيان یې چې څه راسره کوي، څومره امکانات چې لرم، د خپلو امکاناتو په چوکاټ کې ورسره ورته عمل کوم. پر دې باوري واوسېږئ.»
په ورته وخت کې لونګ وایي، د ځانګړي پلان له مخې به لنډو ورځو کې د امنیتي ځواکونو لیکې پیاوړې او د لاسه وتلو سېمو بېرته نیولو لپاره به یرغلېز بریدونه پیل کړي.
بل پلو د پکتیا والي ګل نبي احمدزی وايي، د ولسونو پر مرسته به په ټولو سېمو کې حکومتي ادارې فعالې او شته نیمګړتیاوې به له منځه یووړل شي.
احمدزي زیاته کړه: « ولسونه چمتو دي. هرې خبرې ته چمتو دي. موږ او تاسې به هم جوړېږو، خپل حرکت، خپل سیسټم به لخیره بېرته له سره پياوړی کوو او پر نویو حرکتونو به د قوماندان صاحب پر مشرۍ نور ټول حرکتونه تنظیم کوو.انشاء الله پر وړاندې به ځو.»
دادان لونګ داسې مهال د ۲۰۳ تندر قول اردو قوماندان ټاکل کیږي، چې د پکتیا ، لوګر غزني او میدان وردګ ولایتونو ډېری ولسوالۍ سقوط شوي او د ولایتونو مرکزونو ته نږدې سېمو کې جګړې روانې دي.