د عامې روغتیا وزارت وايي، د کورونا وبا ګواښ لاهم پر لوړه کچه ده او نیوکه یې کړې، چې د خلکو بې غورۍ د کورونا مهار سخت کړی دی.
روغتیاپالانو په ګڼه ګوڼه کې د ماسک کارولو سپارښتنه کوي او غوښتنه یې کړې،چې په ځېنو ځایونو کې دې د ماسک کارول جبري شي.
روغتیاپال قند آغا حسن وايي:« یو عادي ماسک پر ۱۰ افغانۍ دی. نو له ټولو مو هېله دا د ه، چې یو عادي ماسک استعمال کړي، ترڅو خپل او د نورو هېوادوالو ژوند وژغوري.»
روغتیاپالان او د عامې روغتیا وزارت مسوولین په مکرر ډول د روغتیايي سپارښتنو او د ماسک پر کارولو ټېنګار کوي،خو عام خلک ورته پام نه کوي،چې له امله یې د مثبتو پېښو او مړینې کچه لوړه کړې ده.
د کابل ښار اوسېدونکی زین الله محبوبي وايي:« دا چې خلک کورونا وبا جدي نه نیسي او په سرپټي ځایونو کې له ماسکه استفاده نه کوي، د روغتیاپالانو سپارښتونو ته پام نه کوي، دا د دې لامل کېږي، چې دا وېروس لا ډېر خپور شي.»
د روغتیا وزارت د مالوماتو له مخې، هېواد کې پر کورونا وبا د ا خته کسانو شمېر له ۱۲۷زرو لوړ شوی، ۵ زره او ۳۶۰ کسان ترې مړه شوي او څه باندې۷۵ زره کسان ترې بېرته روغ شوي دي.
کورونا وبا د لومړي ځل لپاره د ۲۰۱۹ زېږدیز کال په ډسمبر میاشت کې د چین مرکزي هوبي ولایت په ووهان ښار کې پیدا شوه.
د امریکا متحده ایالتو د جان هاپکنز پوهنتون د شمېرو له مخې، ټوله نړۍ کې پر کورونا وبا د اخته کسانو شمېر له ۱۸۴ میلیونو لوړ شوی او له ۳.۹۸ میلیونه ډېر کسان ترې مړه شوي دي.
