د افغانستان لپاره د پاکستان ځانګړي استازي آصف دراني په خپلو تازه څرګندونو کې ادعا کړې، چې په افغانستان کې داعش ډله د پراخېدو په حال کې ده او پر نورو هېوادونو یې د برید احتمال هم شته.
دراني تور پورې کړی، چې د افغانستان په تړاو د نړیوالو بې غوري ښايي لامل شي، چې له دې هېواده یوځل بیا د سپټمبر یوولسمې په څیر برېد وشي.
خو د سیاسي چارو کارپوهان وايي، افغانانو د سپټمبر یوولسمې پېښه کې لاس نه درلود او د دغې پېښې عاملان هم په پاکستان کې روزل شوي ول.
دوی وايي، القاعده شبکې د سپټمبر د یوولسمې پېښې پړه ومنله او په خبره یې د دې شبکې مشر اسامه بن لادن په پاکستان کې پیدا شو او په دې وروستیو کې د القاعده شبکې یو بل مهم غړی امین الحق هم د دغه هېواد د پنجاب ایالت په ګجرات سیمه کې ونیول شو.
دوی زیاتوي، چې دا ټول ثابتوي چې اسلام آباد له ترهګرو ډلو ملاتړ کوي او نړۍ ته یې صادروي.
د سیاسي چارو کارپوه موسی سعادت وايي: « افغانانو د سپټمبر د یوولسمې پېښه کې لاس نه درلود. که ادعا کېږي، چې په یاده پېښه کې القاعده شبکې لاس درلود، نو د دې شبکې مشر هم په پاکستان کې پيدا او ووژل شو. کله چې امریکا پر افغانستان یرغل کاوه، د ټولو ګاونډیانو له ډلې یوازې پاکستان لاره ورکړه. پاکستان غواړي، چې د افغانستان نوم په نړۍ کې بد کړي.»
څارونکي وايي، د اسلام آباد وروستۍ ادعا او تور د دې ښکارندويي کوي، چې پاکستان غواړي تاریخ تحریف کړي.
دوی وايي، غوښتنه یې دا ده، چې د پاکستان د دغه تور د سپیناوي لپاره په کابل کې د هغوی سفیر احضار شي او له هغې وروسته له دې هېواد سره د ډیپلوماتیکو اړیکو دروازه وتړل شي.
د پوهنتون استاد فیض محمد ځلاند وایي:« د سپټمبر د یوولسمې پېښې ټول عوامل بهرنیان وو،خو روزنه یې په پاکستان کې ترلاسه کړې وه او له اروپا څخه امریکا ته تللي وو. پاکستان هڅه کوي، یوځل بیا تاریخ تحریف کړي او خاورې پر افغانستان واړوي. د دې تور پر وړاندې غلي پاتې کېدل نه دي په کار او اړتیا ده،چې د پاکستان سفیر احضار او له دې هېواد سره اړیکې بندې شي. »
د سیاسي چارو کارپوه توریالی ځاځی وايي: « که اسلامي امارت غواړي، چې خپل هېواد وژغوري، باید په افغانستان کې د پاکستان سفارت وتړي او سفیر یې وشړي.»
ځېنې نور په دې باور دي، که په تېر کې د پاکستان له لوري لګېدلو تورونو او په افغانستان کې یې اوږدمهاله لاسوهنو ته مناسب غبرګون ښودل شوی وای، اوس به اسلام آباد د دومره ستر تور پورې کولو جرئت نه کاوه.
خو اسلامي امارت بیا تل ډاډ ورکوي، چې افغانستان کې هېڅ بهرنۍ وسله واله ډله نه شته او داعش ډله یې هم له منځه وړې.
اسلامي امارت په دې اړه هم ډاډ ورکوي، چې هېڅکله به د افغانستان له خاورې نورو هېوادونو ته ګواښ پېښ نه شي.
د رییس الوزرا سیاسي مرستیال مولوي عبدالکبیر وایي: « له افغانستاه هېچا ته زیان نه دی رسېدلی او په راتلونکې کې هم ډاډ ورکوو، چې زموږ له خاورې به نورو هېوادونو ته زیان ونه رسېږي.»
دا لومړی ځل نه دی، چې پاکستان پرافغانستان دومره ستر او بې اساسه تور پورې کوي، بلکې له دې وړاندې یې هم په وار وار ادعا کړې، چې د پاکستاني طالبانو تحریک (ټي.ټي.پي) په افغانستان کې مېشت دی او له هغه ځایه پر پاکستان برېدونه کوي؛ هغه څه چې سرپرست حکومت تل رد کړي او یاد تحریک یې د پاکستان داخلي ستونزه ګڼلې.
