انګشت شاه چینه د سرپل په سنچارک ولسوالۍ کې ځای لري. دغې چینې ته په دې وروستیو کې له ګڼ شمېر کورنيو سیلانیانو سربېره، بهرني سیلانیان هم ور مات شوي، ښکلې فضا، غرنیزه سیمه او رڼې سړې اوبه هغه څه دي چې د سیلانیانو پام یې ځانته اړولی دی.
دې چينې ته ورغلي سیلانیان خوښ دي او وايي، په ډاډه زړه مېله کوي.
د دوی په خبره، د دې ځای هوا ډېره ښه ده او هرڅوک کولی شي د امنیت په فضا کې مېله وکړي.
له کندهار، بلخ، سمنګان، کابل او نورو ولایتونو څخه په سیل دې چينې ته ورغلي کسان که څه هم خوښ دي، خو د لارې خراب والي او ورته نورو ستونزو له امله شکايت کوي.
یو تن سیلاني وايي:« خلک په ډېرې سختۍ دلته ځان رسوي. لارې خرابې دي، ما ولیدل، چې د ځینو کسانو موټر او وسایط هم خراب شوي وو. موږ له اسلامي امارت غوښتنه کوو، چې دغه تفریحي ځای ته راغلې لاره بیا ورغوي.»
په همدې حال کې ځایي مسوولین وایي، څو ځله یې دغه ستونزې له لوړپوړو چارواکو سره شریکې کړې، خو تر دې مهاله کوم ګام نه دی پورت شوی.
د سرپل ولایت یو تن ځايي چارواکی غلام سخي وايي: « موږ د دې ځای امنیت ټینګ کړی، خو د لارې د جوړولو دنده نه لرو. موږ له اړوند چارواکو غوښتي، چې دلته راغځېدلې لاره ترمیم کړي ترڅو لا ډېر کسان په سیل او چکر راشي.»
که څه هم سرپل ولاست د انګشت شاه په څېر د سیل او سیاحت لپاره ګڼ ځایونه لري، خو د لارو خرابوالی، د ټرانسپورټي اسانتیاوو نه شتون او په تفریح ځایونو کې د امکاناتو نه شتون هغه څه دي، چې د لا ډېرو سیلانیانو د ورتګ مخه یې نیولې ده.
