د سیاسي چارو یو شمېر تحلیل کوونکي وایي، له افغانستان د بهرنیو ځواکونو له وتلو وروسته سیمه ییزو استخباراتو دې هېواد کې د وېرې خورولو کړن لارخپله کړې ده.
دوی وايي، د سیمې استخبارات د هغو کورنیو قدرت طلبو په همکارۍ وېره خوروي،چې ګټې یې د افغانستان په بې ثباتۍ کې دي.
دوی زیاتوي، چې دا وېره د ولایتونو د سقوط نیولې تر کورنۍ جګړې او د بهرنیو سفاراتونو تر تړلو رسیږي.
د تحلیل کوونکو په خبره، د جګړې د زیاتیدو سره اوس تبلیغات هم تر حد اوښتي، د کابل سقوط وېره، د بهرنیو سفارتونو تړل کېدل هغه څه وو،چې حقیقت یې نه درلود، خو د ډېرو فکري ارامښت یې ګډوډ کړی.
اوس پوښتنه دا ده چې دا تبلیغات او اوازې د چا کار دی؟
د سیاسي چارو شنونکی احمد شاه اندړ وايي:« دا د هغو استخبارتو کړیو کار دی،چې په بهر کې له افغانستان سره تضاد لري.
دا په دولت کې لوړ پوړي چارواکي لري،چې شایعات پرې خپروي،ترڅو د افغانستان وضیعت نور هم د کړکېچ لور ته یوسي او جګړه دوامداره وساتي.»
د سیاسي چارو تحلیل کوونکی صلاح الدین سعیدي وایي، د طالب او حکومت له جګړې وراخوا ځېنې کړۍ افغانستان کې شته،چې په دې تبلیغاتو سره غواړي،د خلکو روحیه کمزورې او د بې ثباتۍ په رامنځ ته کېدو سره راتلونکي لپاره خپل پروګرامونه پلي کړي.
هغه وايي، اوس غږ پر نړیوالې ټولنې دی،چې خپل مسولیت ترسره کړي او د تبلیغاتو په شنډولو کې خپل رول ترسره او افغانانو ته باور ورکړي.
سعیدي زیاته کړه: « دا چې د افغانستان خلک د دهشت په لومړي صف کې قرباني ورکوي، نړیوالې ټولنې ته پکار ده،چې خپل رسالت اداء کړي.
دا او دې ته ورته تبلیغات باید په عملي چارو شنډ شي.یو لامل یې داخلي قدرت طلبه او فرصت طلبه افراد او اشخاص دي،چې غواړي له دې حالته سو استفاده وکړي.»
افغانستان کې د جګړې یو اړخ رواني او استخبارتي دی.
په سیمه ییزه او نړیواله کچه استخباراتي شبکې او سازمانونه په تېرو دوو لسیزو کې خورا فعال وو.
افغان حکومت د دې تبلیغاتو په شنډولو کې پاتې راغلی او زیات تمرکز یې پر وسلواله مبارزه وه.
په جګړه کې له ښکیلو اړخونو هم تمه او غوښتنه دا ده،چې له داسې تبلیغاتو او شایعاتو
ډډه وکړي،چې هغه افغانان له وېرې سره مخ کوي.