د هرات مخابراتو ریاست چارواکي ادعا کوي، چې وسله والو طالبانو اسلام کلاه ښارګوټي کې د مخابراتو مدیریت نوري فایبر دستګاه او نور وسایل په بمونو الوځولي دي.
د هرات د مخابراتو رئیس عاشق الله علیزی وايي، طالبان وړمه شپه د اسلام کلاه ښارګوټي مخابراتو مدیریت ته دننه شوي او د انټرنټ دستګاه او نوروسایل يې په بمونو الوځولي دي.
هغه وايي، د یادو دستګاوو په لمنځه وړلو سره د هرات ښار ټولو سیمو کې خصوصي انټرنټي شبکې پرې شوي او یواځې د مخابراتي شبکو انټرنټ ۵۰ سلنه کارکوي.
علیزی وايي، د اسلام کلاه مخابراتو مدیریت د له منځه وړلو له امله دولت ته نژدې یوملیون ډالره زیان اوښتی.
د نوموړي په وینا، د مخابراتو مدیریت له ویجاړولو وروسته نور توکي د سیمې خلکو چورکړي دي.
طالبانو بیا تراوسه په دې تړاو رسنیو ته څه نه دي ویلي.