د برېتانیا ټول سرتېري له افغانستانه پرون ووتل، خو د دغه پوځ یوه لوړپوړي غړي بریتانوي رسنیو ته ویلي، چې ځينې ځانګړي ځواکونه به یې په افغانستان کې پاتې کېږي.
د دغه پوځي چارواکي په خبره، د سرتېرو له پاتې کېدو یې موخه د ترهګرو ډلو د فعالیتونو څارل او افغان ځواکونو ته د مشورې ورکول دي.
سرچینې ویلي، په افغانستان کې وېره ډېره شوې ده، ځکه طالبانو یوازې له بهرنیانو سره سوله کړې او له جګړو یې ښکاري، چې له افغان حکومت سره سولې ته نه دي تیار.
دغه پوځي نه ده روښانه کړې، چې سرتېري څومره دي او تر کومې نېټې به په افغانستان کې وي، خو وايي چې د سرتېرو د حضور د مودې په اړه به بریتانوي امنیتي ادارې پرېکړه کوي.
