د افغانستان علماوو سراسري شورا یو ځل بیا په هېواد کې روانه جګړه د اسلام او مسلمانانو ضد وګڼله.
دیادې شورا سرپرست سردار ځدراڼ وايي، د جګړې ژر درېدو ترڅنګ باید د سولې مذاکرات هم ګړندي شي.
د یادې شورا سرپرست سردار ځدراڼ وايي:« له دواړو غاړو او په ځانګړې ډول له طالبانو مو غوښتنه دا ده،چې نور باید د اسلام او جهاد تر نامه لاندې دغه جګړه ودرول شي. د اسلام بدنام کولو هڅه ونه شي. جګړه د حل لاره نه ده. »
علماء وایي، روانه جګړه کې زیان یوازې افغانانو ته رسېږي، شتمنۍ لوټېږي، کرکې او نفرتونه رامنځته کېږي.
دوی وایي، د مکې مکرمې، بیت المقدس، مصر، پاکستان، اندونیزیا او افغانستان پر کچه د ۲۲ هېوادونو علماوو افغانستان کې روانه جګړه له اسلام سره په ټکر کې بللې ده.
ځدراڼ زیاته کړه:« تاسو په جریان کې یئ،چې د نړۍ ۲۲ اسلامي هېوادونو، زموږ د مصر ستر موفتي، زموږ د بیت المقدس موفتي او امام او زموږ حرمینو شریف د مکې مکرمې امام او د افغانستان، پاکستان او د نړۍ مشهورو دیني علماوو دغه جګړه یوازې کورنۍ جګړه وبلله. د اسلام له نظره یې هېڅ توجیه نه لري.»
د افغانستان د علماوسراسري شورا له طالبانو او افغان حکومت غواړي،چې د جګړې پر مهال د ملکیانو ژوند خوندیتوب ته پاملرنه وکړي او د بحران مخنیوی وکړي.
وسله والو طالبانو تر اوسه پورې د افغان علماوو د دغې تازه غوښتنې په اړه څه نه دي ویلي.
دا لومړی ځل نه دی،چې د افغانستان علماوو شورا او د نړۍ پر کچه یو شمېر اسلامي هېوادونو کې علماء پرېکړه کوي،چې افغانستان کې روانه جګړه اسلامي رنګ نه لري او باید ختمه شي، خو تر اوسه پورې د هېڅ هېواد علماوو فتوا اغیزه نه ده کړې.