د مسکو غونډه کې د سولې پرمذاکراتو خبرې نهکېږي.
طالبانو د یوې اعلامیې په خپرولو سره په غونډه کې خپل ګډون تایید کړی او ویلي یې دي چې د دوی استازي به له هیڅ لورې سره د سولې خبرې ونکړي.
په اعلامیه کې راغلي چې غونډه کې به ټول ګډونوال په افغانستان کې د روان تاوریخوالي او د امریکایانو په موجودیت څیړنیز بحث او خبرې اترې وکړي.
د سولې عالي شورا بیا وايي، دوی هڅه کوي د سولې خبرو لپاره ګډون کوونکي هېوادونه وهڅوي.
د مسکو ځنډلې او د نیوکو سره مخ جوړېدونکې ناسته له زیاتو کشمکشونو وروسته سبا په مسکو کې پلیږي.
د مسکو ناسته کې د دولس هېوادونو د استازو تر څنګ امریکا هم د ګډون لپاره استازی ټاکلی او د سولې عالي شورا ددولت له ادرسه په دې غونډه کې ګډون کړی دی.
د سولې عالي شورا غړي وايي، د مسکو په ناسته کې به د دوی استازي ګډون کوونکي اړخونه د افغان سولې پروسې د ملاتړ لپاره وهڅوي.
طالبانو هم په دې ناسته کې د ګډون خبر وکړی خو په اعلامیه کې یې لیکلي چې دغه ناسته له کوم لورې سره د سولې مذاکراتو نه بلکې د شته ستونز پر حل لارې څیړنیز بحث کیږي.
د ولسي جرګې منشي هر هغه ناسته چې د افغان سولې په اړه کیږي ګټوره خو د مسکو ناسته نیمګړې ګڼي.
په روسیه کې د افغانستان د ستونزو د حل لپاره داسې مهال غونډه جوړیږي چې امریکا اوس عملا د افغان سولې په برخه کې له طالبانو سره خبرو ته داخل شوی چې زلمی خلیزاد د طالبانو له استازو سره هم په قطر کې لیدلي او د راپورونو په اساس دواړو لورو یو بل ته خپلې غوښتنې او شرایط هم وړاندې کړي دي.
