د بښنې نړیوال سازمان له لوري په خپره شوې خپرپاڼه کې راغلي،د جګړې دواړو لورو په وروستیو کې داسې کړنې ترسره کړي، چې هغه د بشر ضد کړنې او جنګي جنایت شمېرل کېږي.
یاد سازمان د طالبانو له لوري د اسیرانو وژلو او همدا راز د حکومتي ځواکونو له لوري د وژل شویو جسدونو ته د اور اچولو پېښو ته اشاره کړې او دا ډول کړنې یې د بشر ضد جنایت بللی دی.
د بښنې نړیوال سازمان همدا راز ویلي، په افغانستان کې روانه جګړه باید ژر تر ژره ودرول شي او ښکیل اړخونه دې خبرو ته سره کېني.
بل پلو د بشري حقونو خپلواک کمېسیون بیا وایي،په افغانستان کې جنګي جنایتونه روان دي او باید یوه نړیواله بې پرې ډله وګومارل شي، ترڅو دغه جنایتونه وڅېړي او په اړه یې خپلواکې پرېکړې وکړي.
