د سوېلي اسیا په چارو کې د ایران بهرنیو چارو وزارت ځانګړی استازی سید رسول موسوي وایي، امریکا په ډېره غیر مسوولانه توګه له افغانستانه وتښتېده او دغه هېواد یې له کورنۍ جګړې سره لاس او ګرېوان پرېښود.
مسوي وايي، افغانستان دمګړی ناسم لور ته روان دی نو په دغه هېواد کې د سیاسیونو، جهادي ډلو او طالبانو مسوولیت دی،چې زړور ګامونه پورته کړي او د زیانونو په منلو د خپل هېواد راتلونکې وژغوري.
د هغه په خبره، ایران او ټوله سیمه په دې باور ده،چې افغان جګړه پوځي حل نه لري او هېڅوک له پوځي لارو واک ته نه شي رسېدلی، له همدې امله طالبانو او افغان حکومت ته په کار ده،چې د سولې خبرو ته سره کېني.
موسوي وایي، ایران تل غوښتي،چې افغان جګړه د خبرو له لارې پای ته ورسېږي او په دې برخه کې به خپلو هڅو ته ادامه ورکوي.
