پنټاګون یا د امریکا دفاع وزارت له لوري په خپره شوې خبرپاڼه کې ویل شوي، پوځ یې د عراق او سوریې پولې ته څېرمه سیمو کې د هغو ملېشو پر مرکزونو بریدونو کړي، چې ایران یې ملاتړ کوي.
خبرپانه کې ویل شوي،دا ځایونه په عراق کې د امریکا ګټو پر وړاندې د بې چلوونکو الوتونکو وسایلو لپاره کارول کېدل.
دغه راز په خبرپاڼه کې د دې بریدونو د تلفاتو په اړه څه نه دي ویل شوي،خو په بریتانیا کې د سوریې بشر حقونو څار ادارې ویلي، په دې بریدونو پنځه هغه عراقي ملېشې وژل شوي،چې ایران یې ملاتړ کاوه.
د یادې ادارې په خبره، په دې برېدونو کې ګڼ شمېر کسان ټپيان شوي هم دي.
بل خوا بیا د سوریې دولتي رسنۍ ویلي، په دې بریدونو کې یو ماشوم وژل شوی او درې کسان نور ټپيان شوي دي.
امریکا کې د ولسمشر جوبایډن واک ته له رسېدو وروسته دا دویم ځل دی، چې د عراق او سوریې پولې ته څېرمه د ایران ملاتړ لرونکو ملېشو مرکزونه په نښه کېږي.