په کابل کې د الازهر انسټیټیوټ مسوولین وایي، ۴۰۰ کسان ورسره د ازموینې لپاره نوم لیکنه کړې، چې ۱۶۰ کسان به د لیسانس، ماسټرۍ او دوکتورا له پاره جذب کړي.
دوی وایي،لومړیتوب هغو کسانو ته ورکول کېږي،چې له عربي ژبې سره بلدتیا ولري.
د ازموینې د کمېټې مشر اوسامه سمیر وايي:« هر کال مصر ۸۰ تنه افغان زده کوونکو ته په مصر کې د زده کړو زمینه برابروله، خو سږکال مو د بورسیو شمیر دو برابره کړ،چې ټول ۱۶۰ کسان دي. پر یو نفر ۵۰ زره ډالره مصرف کیږي،موږ له زده کوونکو هېله کوو،چې کوښښ وکړي که چیرې یو زده کوونکی دوه کاله په درسونو کې پاتې راغی، موږ یې بېرته افغانستاان ته رالېږو.
موږ افغان زده کوونکو ته د خپل اولاد په توګه ګورو. موږهغوی ته په مصر کې د سیاسي فعالیتونو اجازه نه ورکوو او هېله ترې کوو،چې خپلو درسونو ته متوجه واوسي.»
د مالوماتو له مخې، اوس مهال د مصر په مشهورو پوهنتونونو کې له ۱۰۰۰ ډېر افغان زده کوونکي پر زده کړو بوخت دي .
په کابل کې د الازهر انسټیټوټ مشر وایي،غواړي په راتلونکي کال کې د بوریسو شمیر زیاد او له افغانستان سره د اړیکو لړۍ نوره هم پراخه کړي .
په کابل کې د الازهر انسټیټوټ شیخ شوقي ابو زید وايي: «د افغانستان او مصر اړیکې ډېرې پخوانۍ دي. زموږ اړیکې د سیدجمال الدین افغان له وخته دوام لري. موږ زیاد شمیر افغان کادرونه روزلي، لکه د حج اوقافو وزیر محمد قاسم حلیمي، لوی څارنوال ذبیح الله کلیم او داسې نور. موږ غواړو، په راتلونکو کلونو کې د بورسیو شمیر له دې هم لوړ کړو.»
بل پلو ازموینې ته راغلي کسان بیا د پروسې له شفافیت خوښ دي .
مصر له افغانستاان سره د بورسیو په برخه کې له تېرو ۲۰ کلونو مرسته کړې، چې تراوسه پورې یې په زرګونه کسان د اسلامي او عصري زده کړو په برخو کې روزلي دي.