چارواکي وايي، امنیتي ځواکونو د مېرزکه ولسوالۍ پرون ناوخته بېرته له وسله والو طالبانو ونېوله.
د پکتیا امنیه قوماندان سمونوال ایمل نیازي د روانو عملیاتو پر دوام ټینګار کوي او وایي، تر هغه پورې به دوام وکړي، ترڅو ټولې ولسوالۍ بېرته نه وي نیول شوي.
نیازي زیاته کړه: « دا اوس هم موږ نوی امنیه قوماندان له پرسونل سره راوستی دی. لکه څرنګه چې د سیمه ییزو ارګانونو خپلواکې ادارې مشر وویل، ټولې ملکي او پوځي ادارې به فعالېږي او عملیات به تر هغې پورې روان وي،ترڅو ټولې ولسوالۍ بېرته نه وي نیول شوي.»
د ولسي جرګې غړی یارباز حمیدي د جګړې له ښکیلو غاړو د اوربند غوښتنه کوي او له وسله والو غواړي، چې عامه تاسیسات دې نه ورانوي.
حمیدي زیاته کړه: « دا جنګ ګټونکی نه لري. که دوی سوله وکړي. دوی به ګټونکي وي. زما هېله دا ده،چې نور دې د نظام او عامه تاسیساتو له ویجاړولو لاس واخلي.»
بل پلو طالبان بیا د ډیورنډ کرښې بلې غاړې ته د پوځي وسایطو لېږد او د عامه تاسیساتو ورانول ردوي او وایي، د سیدکرم او میرزکې ولسوالیو ودانۍ د جګړې پر مهال زیانمنې شوې دي.
پکتیا کې طالبانو ۹ ولسوالۍ نیولي، چې پر وړاندې افغان ځواکونو عملیات پیل کړي او تر اوسه پورې یې دوه ولسوالۍ ترې بېرته نیولي د پاتې نورو له پاره عملیات روان دي.