ملي امنیت شورا وايي، د وسله والو طالبانو پر ضد پاڅون کوونکي د حکومت په کنټرول کې دي او هېڅ داسې عمل ته به یې پرېنږدي، چې دقانون خلاف وي.
د ملي امنیت شورا سلاکار حمدالله محب ویلي، اول انتخاب مو سوله ده او که طالبان جنګ ته دوام ورکوي، له ځانه دفاع کول د خلکو مسلم حق دی.
محب ویلي، افغانستان کې د طالبانو ضد عناصر زیات دي او افغانان د طالبانو له فکر، لیدلوري او حکومتدارۍ سره مخالف دي.
د ملي امنیت شورا سلاکار، په یوه ټلویزیوني مرکه کې ویلي، هېڅوک نه غواړي، چې په خپل هېواد کې بندي واوسېږي او طالبان غواړي ټول افغانان بندي و اوسي.
حمدالله محب، د افغانستان په چارو کې دبهرنیو لاسوهنو په اړه ویلي، له پاکستان سره زموږ په تعامل کې هېڅ مشکل نه شته، او زموږ موخه دا ده، چې په افغانستان کې د دوی لاس وهنه بنده شي.
هغه ویلي، پاکستان ژمنه کړې وه، چې طالبان سولې ته هڅوي، خو اوس هر څه برعکس دي او اسلام اباد له کابل سره کړې ژمنه عملي نه کړه.
د ملي امنیت شورا سلاکار وویل، افغان حکومت د سولې خبرو لپاره خپل پلاوی قطر کې کېنولی، افغانان سوله غواړي، خو طالبانو تر اوسه سولې ته هېڅ ژمنتیا نه ده ښودلې