افغان جاپان روغتون ته هره ورځ لسګونه کسان ورځي، چې ډېری یې په آیسيیو یا عاجل واټ کې بستر کېږي.
د یو شمېر ناروغانو کورنۍ غړي وايي، د دې روغتون له خدماتو او طبي پرسونل شکایت کوي او وايي، روغتیاپالان د ناروغانو د درملنې او پالنې په برخه کې بې غوري کوي او څنګه چې اړتیا ده،هغسې خدمات نه ورسیږي.
د صدیق الله په نوم یو تن ناروغ لرونکی وايي: «که د ناروغانو پایوازان نه وي او خپلو ناروغانو ته یې رسیدګي ونه کړي نو اویا اتیا سلنه ناروغان مري. ټول کار پخپله پایوازان کوي،روغتیاپالان یوازې شل سلنه د کار ظرفیت لري،چې وروسته له ډېر تاکید یې کولو ته اړباسو.»
دلته یوازې صدیق الله نه دی چې د دې روغتون له خدماتو ناراضي دی او له ډاکترانو شکایت کوي، بلکې رسول خان هم یو له هغو کسانو دی، چې مور یې په دې روغتون کې بستر ده او سختې شپې او ورځې تېروي.
رسول خان وايي، که د روغتیاپالانو پر سر نه وای ولاړ، نو خپله مور به یې د روغتیاپالانو د بې غورۍ له امله مړه شوې وای.
ناروغ لرونکی رسول خان وايي: « روغتیاپالان په سوال او زاریو ناروغ ته راځي،خو هغومره اړتیا چې ناروغ ورته لري، خدمات نه ورسوي او په خپلو شخصي کارونو بوخت وي.»
دې روغتون ته هره ورځ لسګونه کسان مراجعه کوي،چې شااوخوا پنځوس کسان یې ای سي یو یا عاجل وارډ کې بستریږي.
روغتیا پالان وايي، ناروغان هغه مهال افغان جاپان روغتون ته راځي،چې له شخصي روغتون رخصت شي، روغتیایي وضعیت یې خراب او آکسیجن ته یې اړتیا زیاته شي.
روغتیاپال نیاز احمد بیکزاد وايي: « څومره ناروغان چې له آی سي یو واټ نه خارجیږي او بل وارد ته ځي یا کور ته ستنیږي، نو پر ځای یې نور ناروغان بستروو، چې په موټرو کې مو ورته آکسیجن لګولی وي او د خالي بسترونو په تمه وي.»
سره له دې چې پر عامې روغتیا وزارت نیوکې زیاتې دي،خو د عامې روغتیا وزارت مسوولین بیا پر عامو خلکو نیوکې کوي، چې د وبا پرمهال یې روغتیا وزارت سره همکاري نه ده کړې.
تازه عامې روغتیا وزارت وايي، په تېرو ۲۴ ساعتونو کې ۱۰۹۵ مثبتې پېښې ثبت کړي او ۵۶ کسان بیا مړه شوي دي.
روغتیا وزارت وايي، د نويو پېښو له ثبتېدو سره په ټول هېواد کې د مثبتو پېښو شمېر له ۱۱۴ زره او ۲۲۰ ته ورسېد او د مړو شویو کسانو شمېر ۴ زره او ۶۵۰ ته لوړ شو.
