یو شمېر سوداګر او هټیوال وايي، د جګړو شدت بازار په مستقیم ډول تر اغیز لاندې راوړی او له میاشتو راهیسې یې د ګټې پر ځای تاوان کړی دی.
د موټرو یو تن پلورونکی وايي: « پخوا ښه وو بازار، اوس ډیری موټر پلورونکي په میاشتو کې هم یو یا دوه موټره نه پلوري، ځکه بازار نه شته او امنیتي وضعیت په مستقیم ډول زموږ پر کاروبار اغیز کوي، امنیت که ښه وي،بازار هم ښه وي،خو نن سبا خلک موټر اخېستلو ته زړه نه ښه کوي.»
ځیني کاروباریان بیا وایي، له هر قشر پېرېدونکي لري، خو په خبره یې وروستۍ جګړې، کډوالۍ او وزګارتیا د دوی کار خراب کړی او پخوا په شان مزه یې نهشته.
دوی وایي، د ټولنې ټول خلک لکه پخوا بازارونه ته مراجعه نه کوي.
د موبایلو یو تن هټیوالی وايي: « په کابل کې هم د مختلفو کټګوریو خلک دي، دوی د سېمې د امنیت پر اساس راځي.»
باور دا دی،چې خلک روان وضعیت وېرولي او د راتلونکي احتمالي بد وضعیت لپاره سپماء کوي.
بل پلو یو شمېر اقتصاد پوهان هم روان وضعیت مبهم او د خلکو اندېښنې پرځای بولي.
د اقتصادي چارو شنونکی جبار ساپی وايي:« خلک هم هغه مخکې چې غوښتل د خپل خواهش او ضرورت پر اساس شی واخلي،خو د پیچلي امنیت له امله سپماء کوي او خپلې پیسې د احتمالي بد وضعیت لپاره ساتي.»
وروستیو جګړو نه یوازې د خلکو اقتصاد ننګولی، بلکې د سوداګرۍ او صنایعو خونې د معلوماتو له مخې، وروستیو دوه کلونو کې لسګونه سوداګرو او پانګوالو د ناامنۍ او جګړو له امله خپل کار وبار کم کړی او زیاتو یې خپلې پانګې بهر ته لېږدولې دي.
