واک ته د اسلامي امارت له رسېدو وروسته د یو شمېر نورو هېوادونو ترڅنګ، روسیه هغه هېواد دی، چې په دې موده کې یې له سرپرست حکومت سره نږدې اړیکې لرلي او خپلې سفارتي چارې پرخپل حال ساتلي.
د ټاس خبري آژانس د افغانستان لپاره د روسیې سفیر ډیمټري ژیرنوف له قوله لیکلي، نوموړي د یوې پوښتنې ځواب کې په افغانستان کې د نویو کونسلګریو د پرانیستلو امکان مطرح کړی.
ژیرنوف ویلي، که څه هم په لنډمهال کې دې کار لپاره اړتیا نه لیدل کیږي؛ خو وايي د دې امکان شته چې هېواد یې په راتلونکي کې نوې کونسلګرۍ پرانېزي.
هغه زیاتوي:« د اوس لپاره دې کار ته اړتیا نشته؛ خو په راتلونکي کې د هېڅ شي امکان نه رد کیږي. روسیې او افغانستان له ۱۹۱۹ز کال راهیسې خپلې ډېپلوماټیکې اړیکې ټینګې کړي. له هغه وخت راهیسې یې په کابل کې له سفارت او په مزار شریف کې له کونسلګرۍ پرته، موږ په هرات او میمنه کې کونسلګرۍ پرانیستې او په جلال اباد کې مو د کونسلګرۍ د پرانیستلو پلان درلود.»
ژیرنوف ویلي، روسي وګړیو ته یې د لنډمهال لپاره افغانستان ته د نه سفر کولو سپارښتنه کړې او اصلي لامل یې په بامیانو کې پر بهرنیو وګړو د داعش ډلې د تېرې مې میاشتې وسله وال برید بللی چې د اسپانیا، اسټرالیا او ناروې وکړو ته په کې مرګ ژوبله واوښته.
د سیاسي چارو شنونکي له روسیې سره مخ پر ودې سیاسيی اړیکې د افغانستان پر ګټه ګڼي او د ډېپلوماټیکو اړیکو پراختیا د دواړو هېوادونو اقتصادي او سوداګریزې ودې ته د بستر غوړولو په مانا بولي.
د سیاي چارو شنونکی شېر حسن حسن وايي:« افغانستان د روسیې لپاره ډېر مهم دی او د شانګهای تړون هم په همدې موخه جوړ شو، چې روسیې او چین هڅه کوله، چې په آسیايي هېوادونو کې د امریکا اغېز کم کړي، نو ځکه روسیه دې متوجې ده او افغانستان د جغرافیايي ارزښت له مخې، ځانګړی ارزښت لري، دوی هڅه کوي، چې د چابهار بندر له لارې چې هندیانو هم په کې ډېره لویه پانګونه په کې وکړه، دغه بندر ایرانیانو ته هم مهمه دی، چې یو نړیوال ارزښت ورکړي او په خپله روسانو ته هم، ځکه ایران روسانو متحد هېواد دی او چین هم، نو ځکه له افغانستان پرته دوی بله هېڅ چاره نه لري.»
بل پلو ځېنې نور بیا په دې نظر دي، چې روسیه غواړي له اوسني حکومت سره د اړیکو په رغولو سره ځان ته په سیمه کې یو نوی متحد ومومي.
دا داسې حال کې ده، چې له دې وړاندې روسیې د ترهګرو له تور لېسته د سرپرست حکومت د چارواکو د لرې کېدو د غور خبره مطرح کړې وه؛ خو په دې اړه تر دې دمه عملي اقدام نه دی شوی.
