له تېرې یوې اوونۍ راهیسې د یو شمېر هېوادونو چارواکو په افغانستان کې د وسله والو ډلو شتون او نشه یي توکو د قاچاق په تړاو اندېښنې ښودلې دي.
د همدغو اندېښنو په لړ کې د روسیې دولتي خبرې اژانس ټاس د ټولیز امنیت تړون سازمان د منشي ایمان قلي تاسمګامبتوف له قوله راپور ورکړی، چې له افغانستانه د وسله والو ډلو پراختیا او د نشه یي توکو قاچاق په تړاو یې اندېښنه ښودلې او افغانستان یې د منځنۍ اسیا هېوادونو د بې ثبانۍ اصلي سرچینه بللې.
هغه زیاته کړې:« په منځنۍ اسیا کې د ناامنۍ اصلي مرکز اوس هم افغانستان دی. د ځېنو هڅوونکو بدلونونو سره سره، د ترهګرۍ د پراخېدا، د سخت دریځۍ ایډیولوژۍ او د نشه يي توکو د قاچاق احتمالات نه یوازې دا چې نه دي کم شوي؛ بلکې نوې بڼې یې غوره کړي.»
تاسمګامبتوف د ملګرو ملتونو د امنیت شورا په ناسته کې ویلي، د ټولیز امنیت تړون سازمان له افغانستان نه د احتمالي ګواښونو پر وړاندې د مبارزې لپاره یوه کاري ډله جوړه کړې.
په ورته مهال اسلامي امارت د ټولیز امنیت تړون عمومي منشي څرګندونو ته په غبرګون کې ویلي، افغانستان کې اوس خپلسرې ډلې ځای نه لري او ډاډ ورکوي، چې د افغانستان له خاورې هېچاته ګواښ متوجه نه دی.
په قطر کې د اسلامي امارت سیاسي دفتر مشر سهیل شاهین وايي:« په افغانستان کې اوس امنیت دی، خپلسرې ډلې ځای نه لري. ډاډ ورکوو، چې د افغانستان له خاورې هېچاته ګواښ متوجې نه دی، بلکې اوس د دې وخت دی، چې سیمه د اقتصادي همکارۍ او سوداګریزې راکړې ورکړې، په پیوند سره ونښلول شي.»
د سیاسي چارو کارپوهان د ټولیز امنیت تړون سازمان عمومي منشي څرګندونو ته په اشاري وایي، سرپرست حکومت د نشه یي توکو کښت، قاچاق، او ترهګرۍ پر وړاندي اغېزمنه مبارزه کړې او د سیمې او نړۍ هېوادونه غواړي چې د ترهګرۍ او نشه یي توکو قاچاق کې باید له سرپرست حکومت سره ګډه مبارزه کې همکارۍ وکړي.
د سیاسي چارو کارپوه کمال ناصر اصولي وايي:« دغه ډول هېوادونه هېڅ وخت په خپلو برنامو او دوستیو کې د افغان ولس لپاره پاک نه وه، نو افغان ولس باید دې متوجې وي، چې دوه مخی سیاست کوي او په داخل د افغانستان کې هم هغه کړۍ چې سرزوري کوي، باید دې ته غاړه کېږدي، چې د افغان ولس ژوند د ښه والي پر لور ولاړ شي. قانونمند دولت جوړ کړي، ترڅو هر افغان او هر قشر په افغانستان کې په دولتدارۍ کې هم ځان وویني او هم د خپلو ماشومانو راتلونکی وویني، ترڅو په افغانستان کې د هوسا ژوند خاوندان واوسي.»
دا په داسې حال کې ده، چې تېر کال هم د ټولیز امنیت تړون سازمان د افغانستان له خاورې د دغه تړون غړو هېوادونو ته د ترهګرو ډلو د نفوس او ورتللو په اړه اندېښنه ښودلې وه، خو هغه مهال د ملي دفاع وزارت د هېواد پولې د سرحدي ځواکونو تر کنټرول لاندي ګنلې وي او سرحدي سیمو کې د ترهګرو ډلو حضور یې رد کړی وه.
