د کندهار ولایت جګړه ځپلې ارغنداب ولسوالۍ کې، لسګونه ديني عالمانو او ځوانانو د يوې ناستي پر مهال د وسله والو پر وړاندې د افغان ځواکونو او ولسي پاڅونوالو د رامنځته کېدو ملاتر اعلان کړ.
دوی وايي، هېواد کې د امن او ثبات لپاره اړينه ده،چې د افغان ځواکونو ليکې پياوړي شي.
خلک وایي، پر ارغنداب د وسله والو د بريد پر مهال ولس درانه زيانونه ولېدل، ځمکنیو ماینونو کې ووژل شول، ترانسپورټي لارې يې تخريب او اقتصادي سرچينې يې زيانمنې شوې، نو ځکه نور د افغان ځواکونو ليکې پياوړي کوي.
وسله والو څو مياشتې وړاندي د کندهار پر ارغنداب، شاوليکوټ، ژړۍ، پنجوايي، ميوند او ډنډ ولسوالیو ډله یيز بريدونه وکړل، چې د جګړې د لورو ترڅنګ په کې ملکي خلکو ته هم مرګ ژوبله واوښته، خو طالبانو په ځلونو ویلي، ملکي زيان د افغان هوايي ځواکونو د بريدونو له امله رامنځته کیږي، هغه ادعا، چې افغان ځواکونه يې نه مني.
