د پاکستان بلوچستان ایالت مرکز کویټه ښار کې لسګونو زرو پښتنو د نامتو سیاستوال عثمان کاکړ په جنازه کې ګډون وکړ او له دې وضعيت يې د خلاصون په موخه په يوې اجماع هوکړه وکړه.
د کاکړ په جنازه کې انقلابي شعارونه او د لراوبر نعرې پورته شوې، چې د يو لوی خوځښت فرصت بلل کېږي.
د لراو بر دا نعرې د پاکستان د استخباراتو په خوله کې، داځل دومره لوړې او زورورې وې، چې د پښتنو سربېره بلوڅانو هم بدرګه کړې.
د بلوڅانو یو قومي مشر وايي: « زموږ بریا نږدې ده، زموږ منزل نږدې دی او د دې کار لپاره د مظلومو قومونو اتحاد اړین دی.»
دا لسګونه زره کسان د پاکستان له جبر په تنګ او مجبور راوتلي، خو د عثمان کاکړ د جنازې مراسم د پښتنو د يووالي او يوې سترې اجماع لپاره فرصت ځکه بلل کيږي، چې د کرښې دواړه خواوو شته ستونزو لپاره به يوه لويه جرګه جوړه شي.
سیاستوال محمودخان اڅکزی وايي: « تر درېیو میاشتو اوړي، وروسته به په بنو کې جرګه شو، ټول پښتانه سیاستوال به په کې برخه واخلي او د قوم ستونزې به مطرح کړو.»
د پښتون ژرغورنې غورځنګ مشر منظور احمد پښتین په سيمه کې يوځل بيا پاکستان تورن کړ، چې په افغانستان او پښتنو سیمو کې جګړې کوي.
پښتین زیاته کړه:« عثمان لالا افغانستان کې هم امن غوښته او د کرښې دېخوا يې هم غوښته. هغه د دې ډالري جنګ پای ته رسول غوښتل.»
د پښتون ژغورنې غورځنګ غړی محسن داوړ بیا داسې وايي:« موږ به د هغه لار وڅارو. موږ له دې ریاسته د تحقیق غوښتنه نکوو، ځکه همدی مې وژني.»
پاکستان د افغان حکومت لوړرتبه پلاوي ته وېزې ورنه کړې، چې د جنازې په مراسمو کې ګډون وکړي، خو په مراسمو کې د ولسمشر پیغام ولوستل شو.
د ولسمشر محمد اشرف غني پيغام :« د عثمان کاکړ مړينه افغان ولس ته لويه ضایع ده.»
عثمان کاکړ د ملي عوامي ګوند د بلوچستان ایالتي مشر او پخوانی سناتور و، چې درې ورځې وړاندې یې د کراچۍ په اغا خان روغتون کې ساه ورکړه.
د کاکړ کورنۍ او د پښتونخوا ملي عوامي ګوند ویلي، پر کاکړ څو ورځې وړاندې په خپل کور کې برید شوی وه او نوموړی د سر برخه کې سخت ټپي شوی وه .
د عثمان کاکړ جنازه پرون د هغه په پلرنۍ سیمه د کویټې مسلم باغ کې ادا او هماغلته خاورو ته وسپارل شو.
د هغه د جنازې په مراسمو کې لسګونو زرو کسانو برخه اخېستې وه او په ګڼو نورو ځايونو کې يې هم غيبي جنازې وشوې.