په وروستیو څو اونیو کې جګړه تر بل هروخت زور اخېستی او طالبانو د لسګونه ولسوالیو د نیولو ادعا کړې، اطلاعات او کلتور وزارت د تاریخي ابداتو پر وړاندې اندېښنه ښیې.
د یاد وزارت سرپرست محمد طاهر زهیر له خلکو غوښتي،چې د تاریخي ابداتو په ساتنه کې، د هېواد او خلکو هویت، عزت او ارزښت دی، مرسته وکړي.
زهیر زیاته کړه: « د لاس لاس په کېدو پر مهال د تاریخي ابداتو او فرهنګي مېراثونو په اړه یوڅه اندېښنه شته. »
هغه ټېنګار وکړ،چې تاریخي ابدات او کلتوري میراث، زموږ عزت، هویت او تاریخي سند دی او باید ساتنه یې وشي.
وروستیو نښتو کې چې پرمهال یو شمېر سیمې د وسله والو طالبانو لاسته ولوېدې،خواله رسنیو کې داسې ویډیوګانې لاس په لاس شوې، چې ځینې ځایونه په کې دعامو خلکو له خوا لوټ کېږي.
د اطلاعات او کلتور وزارت د کلتور او هنر مرستیال محمد هارون حکیمي بیا وایي، لوټ د افغانانو فرهنګ نه دی.
حکیمي زیاته کړه:« زموږ ځېنو ځايي وګوړو له لوري د یو شمېر توکو د لوټ هڅه شوې. دا زموږ د هغه کلتوري اړخ ښکارندويي کوي،چې هغه زموږ نه دی. موږ باید د خپلو تاسیساتو د مالکیت احساس ولرو. هر هغه وګړی، هر هغه څوک چې غږ یې اورېدل کېږي، هر هغه رسنۍ او هر هغه بنسټ چې په دې اړه لږ تر لږه خبرېږي،مسوولیت لري، چې زموږ خلک وپوهوي،چې موږ بنسټونه، تاسیسات باید له خپلو امکاناتو جوړ کړو. دا چې له دولتي امکاناتو جوړ شوي، پالنه یې پر موږ فرض ده. »
اطلاعاتو اوکلتور وزارت وا يي، روانه جګړه چې هېڅ شرعي او اخلاقي بنسټ نه لري، نه یوازې قربانیان یې افغانان دي،بلکې د هېواد لرغوني کلتوري میراثونه یې له ګواښ سره مخ کړي دي.