کندهار ولایت کې د انګورو فصل رانږدې کېدو سره د کرنې، اوبو لګولو او مالدارۍ وزارت دې ولایت کې باغ لرونکو ته د انګورو د ضايعاتو د مخنیوي روزنیز پروګرام پیل کړی دی.
د یاد وزارت د کرنیزو محصولاتو پروژې مسوول قیس ادیب وايي، له دې کاره یې موخه د انګورو د کیفيت لوړول او ساتنه ده.
ادیب وایي، افغان دولت د مېوو او په ځانګړي ډول د انګورو د کلنیو ضايعاتو د مخنیوي په موخه دغه ګام اخستی دی.
د هغه په خبره، د باغ لرونکو ظرفيتونو په لوړېدو سره به د انګورو ضایعات او اقتصادي زيان کم شي.
اديب زیاته کړه: « کندهار ولایت کې ۱۰۷۶ د ممیزو کارخونې دي. باغ لرونکو ته دا سیمنار د دې په خاطر ورکوو، چې څنګه په کارخونو کې ممیز تولېد کړي. انګور څنګه کارخونو ته راوړي. کوم انګور باید کارخونې ته راوړل شي. »
د بل پلو کندهار انګورو باغ لرونکي هم د خپلو حاصلاتو د زيانونو د مخنیوي او مارکيټ پورې د رسېدنې برخه کې دا ډول روزنيز پروګرامونه ګټور بولي.
د پنجوايي ولسواۍ باغ د انګورو باغ لرونکی محمد داود وايي: « که څېرې دا شان سیمنارونه نور هم دایر شي، نو باغ لرونکي به پر دې پوه شي، چې له خپلو باغونو ښه حاصلاته په ښه طریقه ترلاسه کړي.»
کندهار کې د کرنې وزارت ولایتي استازو ویلي، د دغه ولایت د مېوجاتو او سبزيجاتو د کيفيت لوړونې او ساتنې په برخو کې ګڼ شمېر کرنیزې پروژې روانې دي،چې په بشپړېدو سره به يې د دغه ولایت کرنیز سکټور لا پياوړی شي.
