هندوستان ټایمز ورځپاڼې د قطر د ځانګړي استازي مطلق بن ماجد القحطاني له قوله ویلي، هندي چارواکو په قطر کې له طالب مشرانو سره لیدلي دي.
ورځپاڼې لیکي، له طالبانو سره د هندي چارواکو د لیدنې خبر وروسته تر هغه ورکول کېږي چې د هند د بهرنیو چارو وزیر په تېرو دوو اوونیو کې دوه ځله دوحې ته تللی او د یاد هېواد له لوړ پوړو چارواکو سره یې خبرې کړې دي.
ورځپاڼې د قحطاني له قوله ویلي، دا فکر باید ونه شي چې طالبان به په راتلونکې کې پر ټول افغانستان واک وچلوي، خو ټینګار کوي چې طالبان د افغانستان راتلونکې کې مهم او کلیدي رول لري.
قحطاني ویلي، افغانستان نباید د نیابتي جګړو پر ډګر بدل شي ځکه، امن او با ثباته افغانستان د پاکستان، هند او ټولې سیمې په ګټه دی.
