ترکي او امریکايي چارواکي د حامد کرزي نړیوال هوایي ډګر د امنیت پر سرخبرې کوي.
د ترکیې د دفاع وزارت یوې سرچینې ویلي، چې په نږدې ورځو کې به یو امریکایي پلاوی ترکیې ته ولاړ شي او هلته به د حامد کرزي نړیوال هوایي ډګر پر امنیت له ترکي چارواکو سره خبرې وکړي.
تر اوسه نه دي ویل شوي، چې دغه لیدنه به په کومه کچه وي، خو امریکا د دې غوښتونکې ده، چې ترکیه د کابل هوایي ډګر د ساتنې مسوولیت پر غاړه واخلي.
دوه ورځې وړاندې د ترکیې د بهرنیو چارو وزیر هم وویل، چې دوی د دغه مسوولیت اخیستلو ته تیار دي او په خبره یې، دا نه یوازې د افغانستان لپاره مهم اقدام دی، بلکې د ټولو هېوادونو د ډيپلوماتیک ماموریت د خوندي کولو لپاره پر ځای ګام دی.
افغان حکومت بیا وار د مخه له دې اقدام هر کلی کړی، خو طالبانو ویلي، چې ترکیه دې د دوحې هوکړې ته ژمنه پاتې شي او خپل سرتیري دې له افغانستانه وباسي.
