د افغانستان تخنيکي ټيم په روباټیک او ټکنالوژۍ کې د لومړۍ ځل لپاره په نړيوالو سیالیو کې څلورم مقام خپل کړی.
دغه سيالۍ په چين کې د يوه کمر بند او يوې لارې تر عنوان لاندې ترسره شوي او په لړ کې يې د افغانستان په ګډون له ۶۱ هېوادونو ۳۰۰ کسانو برخه اخېستې وه.
په دې سياليو کې افغانستان ټيم وکړای شول، چې د روباټیک او ټکنالوجۍ په برخه کې د خپلو سیالو ټيمونو پر وړاندې ښې سیالۍ وکړي او څلورم مقام خپل کړي.
د افغانستان ټيم غړي، چې اوس کابل ته ستانه شوي وایي، د نورو هېوادونو تخنيکي ټيمونه په ډېرو برخو کې له اړینو امکاناتو برخمن ول؛ خو په خبره يې افغانستان د امکاناتو پر نشت سربېره وکړای شول څلورم مقام خپل کړي.
د سیالیو یو تن ګډونوال محمد فریدون وايي: « هغوی یوازې په یوه برخه کې تخصصي زده کړې درلودې، وايي یوازې په میخانیکي برخه پوهېږم یا د برېښنا په برخه پوهېږم، په نورو نه پوهېږم؛ زموږ په هېواد کې داسې نه ده. موږ د روباټيک په ټولو اصلي او اساسي پنځو برخو پوهېږو او دا زموږ د پیاوړتیا ټکی و او د دې لامل شو چې یو ښه مقام او لاسته راوړنه ولرو.»
دوی له سرپرست حکومت غواړي، چې د ورته لاسته راوړنو د دوامداره کېدو لپاره دې ورته اړینې اسانتیاوې برابرې کړي.
د لوبو ګډونوال دغه راز زیاتوي، که چیرې يې سرپرست حکومت ملاتړ وکړي، کولی شي په راتلونکو نړیوالو سیالیو کې لومړۍ مقام خپل کړي.
د سیالیو یو تن ګډونوال ذکریا عمري وايي: « کله چې موږ ځو بازار ته ګورو چې هغه ټکنالوژي چې یوه ورځ مخکې وه اکسپایر شوې ده او پر ځای یې نوې ټکنالوژي راغلې ده. یو څه وخت به نیسي خو موږ کولی شو ځانونه ابډیټ کړو، یوازې ورځنۍ ټکنالوژۍ چې نورو هېوادونو ته راوړل کېږي او ګټه ترې اخېستل کېږي که هغه موږ ته راکړل شي؛ نو ان شاءالله ډېر لوړ استعدادونه لرو او کولی شو چې په رتلونکو دورو کې لا ښه مقام ترلاسه کړو.»
د تخنیکي او مسلکي زده کړو ملي ادارې چارواکي مني، چې د افغانستان د ټکنالوژۍ او روباټیک علمي برخه د امکاناتو له پلوه له ستونزو سره مخ ده، خو ډاډ ورکوي، چې سرپرست حکومت به یادې برخې ته جدي پام کوي.
د تخنیکي او مسلکي زدهکړو ملي ادارې سرپرست غلام حیدر شهامت وايي: « لومړی دا چې په تېر نظام کې یوه وکیل یوازې دا چې په خپل نامه یې یو انسټیټیوټ جوړ کړی و چې اوس نشته او بد میراث یې پاتې دی، ځکه موږ چې هلته ځو ګورو چې نه لابراتوار شته نه تعمیر شته، نه تحقیقي کتابتون شته او د عملي زده کړو لپاره هېڅ زمینه برابره نه ده؛ نو ان شاءالله موږ ژمنه کوو چې دا زموږ موخه ده څو داسې کار وکړو چې ستونزې حل شي او دې ټيم ته یوازې د تحسین نامې په ورکړې اکتفا نه کوو، ان شاءالله دوی به ستایو او د رئیس الوزرا ملاقات ته به یې رسوو.»
د چین د يوه کمر بند او يوې لارې نړیوالو سیالیو درې ورځې دوام درلوده او په پايله کې يې چین لومړۍ، جاپان دويم، شمالۍ کوریا او افغانستان یو پر بل پسې درېيم او څلورم مقامونه ترلاسه کړي دي.
