په پلازمېنه کابل ښار کې یو شمېر متقاعد افسران را ټول شوي،د کورنیو چارو او د ملي دفاع له وزارتونو د خپلو حقوقو غوښتنه کوي.
دغه متقاعد افسران وايي، د ریفورم او کوپراتیف پیسې د حکومت له لوري کورنیو چارو وزارت ته ورکول شوي او له تېرو څو کلونو راهیسې نه دي ورکول شوي.
د متقاعد افسرانو د ټولنې یو تن غړی وايي:« د ۶۰ تمې مادې له مخې، مو د ټولو متقاعدینو حقونوغوښتنه کړې، خو تر اوسه پورې هېڅ هم نه دي شوي. اصلا په کورنیو چارو وزارت کې هېڅ قانون شتون نه لري.
د کورونیو چارو وزارت غواړي، چې د متقاعدینو ټول حقوق له منځه یوسي. »
دغو افسرانو نیوکه وکړه،چې ولسمشر اړونده ادارو ته د ریفورم او کوپراتیف پیسو د ورکولو په تړاو حکم هم ورکړی، خو په خبره یې د کورنیو چارو وزارت یې په اړه ګام نه پورته کوي.
په ورته وخت کې دوی خبرداری ورکړ،که حق یې ورنه کړل شي، لاریونونه به پیل کړي.
د متقاعد افسرانو ټولنې غړی وايي: « هغه کسان چې د برحاله وظیفې پر مهال ریفورم شوي ول، په داسې حال کې چې هغه مهال کوم کسان ریفورم شوي ول، تنخوا یې لوړه وه. هغه تنخوا یې هم له موږ خوړلې او نه ده راکړل شوې. »
د افغانستان د متقاعدو افسرانو ټولنه وایي، د هر ساتنمن له تنخوا د کار له پیله د کاري دورې تر پایه پورې ګرځول شوې یو اندازه تنخوا یا کوپراتیف پيسې یې حق دی او له اړونده ادارو غواړي،چې پرر وخت یې ورکړي، خو کورنیو چارو وزارت په دې تړاو له خبرو کولو ډډه و کړه.
